Heyr heyr...

2004-05-05T21:42:00.000Z

Veljum íslenskt
Þá er mín búin að fá sér nýja bloggsíðu og það íslenska. Mun einfaldara hreint. Hér er slóðin:

http://blog.central.is/ylfingur

Allir sem eru með link á síðuna mína þurfa nú að gjöra svo vel og breyta ;o)

2004-05-04T23:49:00.000Z

Jæja þá er komið að mínu mánaðarlega bloggi, eða það mætti í það minnsta halda ;o) Það er ekkert smá mikið búið að gerast á þessum mánuði frá því síðast. Núna er ég búin að skila lokaritgerðinni og á bara eftir að skila tveimur verkefnum í viðbót. Þá er skólinn búinn og mín barasta komin með aðra höndina á prófskírteinið og næstum því orðin kennari. Loksins, segi ég nú bara. Ekki það að maður sé neitt búinn að vera lengi að þessu. Bara þessi hefðbundnu þrjú ár en maður er nú kominn með leið þrátt fyrir það.

En það merkilegasta sem hefur gerst síðasta mánuðinn í lífi mínu er að hann Þorri minn kom í heiminn. Hann er algjör gullmoli og er sko ekki að gera mömmu sinni lífið leitt. Drekkur og drekkur og sefur þess á milli. Hann vaknar m.a.s. sjaldan yfir nóttina til að drekka. Yfirleitt bara einu sinni. Annað en hún systir hans sem vaknaði margoft yfir nóttina til að drekka og er tiltölulega nýhætt að vakna á næturnar, þessa elska. Þorri litli var svo tillitsamur að leyfa mömmu sinni að klára lokaritgerðina sína áður en hann ákvað að koma. Sunnudagskvöldið 25/4 lauk ég við ritgerðina og fór að sofa. Svaf ekki vel um nóttina því ég var með svo mikla fyrirvaraverki. Vaknaði svo kl. 5:40 við sterkan verk og stóð upp. Missti þá slatta af legvatni og stóð í polli á gólfinu. Iðunni var komið fyrir í pössun og við Valli kíktum upp á deild um kl. 11. Vorum send heim þó hríðar væru reglulegar og stutt á milli. Ástæðan var sú að það greindist ekki að legvatn væri farið við skoðunina og útvíkkunin virtist ekki vera nein. Ég húkti því kvalin heima allan daginn, með verki á 5-20 mín. fresti. Horfði á Survivor um kvöldið og þurfti virkilega að anda mig í gegnum þáttinn út af verkjum. Fór svo upp í rúm að þættinum loknum og náði að sofna pínulítið. Vaknaði svo um kl. 00:30 og gat hvorki legið, setið né staðið fyrir verkjum. Hringdi upp á deild og sagði að ég væri að koma og ætlaði ekki heim aftur. Vorum komin þangð um kl. 1 og var ég látin í mónitor sem greindi það sama og hann hafði gert þegar við komum fyrr um daginn. Þ.e. sterkar og reglulegar hríðar, núna á um 4 mín. fresti. Þegar ljósmóðirin athugaði útvíkkunina kom í ljós að hún var orðin fjórir þannig að ég fékk að fara inn á fæðingarstofu. Þá var kl. um 2 og þegar kl. var orðin 5 þá var útvíkkun orðin 6 og ég var komin með nær samfelldar hríðar og fékk mænudeyfingu. Einni og hálfri klukkustund síðar var ég komin með Þorra í fangið og tók rembingurinn aðeins 5 mín. Þá var kl. 6:32 þann 27. apríl. Vá hvað ég var glöð að sjá hann loksins ;o)

Jæja, skyldan kallar…

2004-04-04T00:56:00.000Z

Hmmm....

You're a Glass of Wine!

What Type of Alcoholic Beverage Are You?
brought to you by Quizilla

2004-03-31T18:02:00.000Z

Ég:

- er búin að fá mér nýjan gemsa svo fólk á ekki lengur von á að það skellist á það, nema ef viðkomandi er afspyrnuleiðinlegur…
- fékk mér bræðing í hádeginu og minnir brjóstsviðinn mig svo sannarlega á það
- læt mig dreyma um RISASTÓRA páskaeggið sem fylgdi með símanum mínum og ég er búin að koma haganlega fyrir inni í geymslu
- fékk skipun frá ljósmóðurinni og lækninum í gær um að hætta að gera nokkurn skapaðan hlut heima hjá mér. Valli elskan var með mér og tók þetta allt afar alvarlega. Í dag er hann búinn að laga til í Iðunnar herbergi og er að elda e-n yammí pastarétt ;o)
- ætla ég að liggja uppi í sófa í kvöld og glápa á sjónvarpið án þess að fá samviskubit. Sirrý virkar m.a.s. meira freistandi en e-r ritgerðarsmíð
- sótti um fæðingarstyrkinn hjá TR í dag og gekk út ánægð með nokkuð góða þjónustu. Átti ekki von á því…
- ætla að skella mér í fótabað fyrir matinn

2004-03-29T11:16:00.000Z

Draumur.is
Mig dreymdi ekkert smá skrítinn draum í nótt. Ég var stödd í e-m stigagangi í sjö íbúða blokk sem Grimms bræður áttu að búa í. Ég gékk upp stigann og fór inn í allar íbúðirnar, var víst að leita persónum úr ævintýrunum þeirra en fann enga þeirra. Mér var sérstaklega mikið í mun að finna Hans og Grétu og e-n úlf sem var ekki vondur en ég áttaði mig ekki á því úr hvaða ævintýri hann átti að vera. Hver íbúð var máluð í sitthvorum litnum og öll húsgögn voru í stíl við litinn á veggjunum. Ég man að ein íbúðin var öll brún, önnur öll bleik og þriðja öll fjólublá og var ég hrifnust af þeirri fjólubláu. Í brúnu íbúðinni fann ég svo Maríu afmælisbarn og Frostaling. María sagði mér að engin af ævintýrapersónunum væri heima eins og væri og heldur ekki Grimms bræður sjálfir. Einhverra hluta vegna varð ég miður mín yfir því.... Þvílíka ruglið, kenni hitanum í herberginu mínu um þennan óráðs draum ;o)

2004-03-26T16:15:00.000Z

Vá hvað ég er södd!! Er búin að innbyrða mikið af veislumat í dag. Sjávarréttagratín, sjávarétti í camembertsósu, lax með rauðlauksmauki, lauk- og ostaböku, gúrkusúpu og margt fleira. Í eftirrétt voru svo perur í smjördeigi með ís og skógarberjasósu, nammi namm. Á morgun verður það svo enn meiri veislumatur. Allt frá svínasteik upp í andabringur og svo alls kyns veislukökur í eftirrétt. Það besta við þetta allt saman er að ég hef ekkert þurft að elda sjálf ;o) Er búin að vera í staðbundinni lotu inni í skóla og þar sem ég er orðin algjör sjúklingur, sit ég bara á stól og horfi á stelpurnar elda og borða svo allt gúmmilaðið með þeim. Grindargliðnunin er nefnilega orðin svo slæm að ég næ ekki að lyfta fótunum yfir þröskuldinn á morgnana og er svo með e-n bévítans verk í öðrum ökklanum sem lýsir sér eins og tognun. Þessi verkur tengist grindargliðnuninni og er ekkert hægt að gera annað en að vona að litli drengurinn sýni aldraðri og þjáðri móður sinni þá virðingu að dvelja ekkert of lengi þarna inni. Við sjáum nú til með það...

Valli er að fara og fá sér bjór með strákunum í vinnunni á eftir. Ég treysti mér ekki til að vera ein heima með Iðunni því ég er bara ekki fær um að sjá um að koma barni í háttinn. Því ætlum við mæðgur að fara til p+m í kvöld og gista þar. Líst ekki illa á það því þá get ég horft á Idolið óruglað og farið í bað (ekki sturtu). Plús það að láta dekra svolítið við sig. Ekki slæmt það.

2004-03-23T21:44:00.000Z

Það er ekki langt í að ég verði karlæg, svei mér þá. Eftir að hafa þurft að fara tvo daga í röð út úr húsi til að læra þá stend ég varla í fæturna. Fór í gær upp í skóla og hékk allan daginn á bókasafninu að lesa Öldina okkar, alveg frá 1901 til 1995. Ekkert smá gaman, verð ég að viðurkenna, þó það hafi verið í námsskyni en ekki einungis til skemmtunar. Í dag fór ég svo til Sigrúnar að skanna, klippa, líma og skrifa sagnfræðilegan annál. Þó ég hafi nú setið á rassgatinu megnið af tímanum líður mér eins og ég hafi klifið Esjuna eða eitthvað þaðan af verra. Greinilega ekki tekið út með sældinni að vera með grindargliðnun. Það versta er þó að þessir tveir dagar eru víst kid stuff miðað við það sem koma skal. Því næstu 5 daga mun ég standa upprétt í nokkra klukkutíma inni í skóla að elda. *Gubb* Hverjum dettur í hug að láta ungar óléttar konur koma á laugardegi og sunnudegi að elda? *Væl væl væl* En það er þó einn ljós punktur í þessu öllu saman. Þessir fimm eldunardagar áttu að vera rúmri viku seinna og get ég ómögulega svarið fyrir að hafa staðið hér enn á þeim tímapunkti. Ofan á gliðnunina er ég nefnilega komin með e-n brjálaðan verk í löppina (ég elska það þegar fólk segir löpp). Fyrst hélt ég að þetta væri klemmd taug en núna veit ég ekki hvað ég á að halda. Fóturinn er tvöfaldur og voða stirður og ég get ekki stigið almennilega niður í hann. Iðunn spurði hvort fóturinn væri nokkuð að detta af mér þegar ég bað hana um að nudda mig áðan. How sad it is, að biðja 3 ára barn um fótanudd :o/ Valli vissi ekki hvað hann átti að halda þegar ég skrapp í búðina áðan og kom ekki heim fyrr en hálftíma liðnum. Er vanalega max. 15 mín þarna. En þar sem það er fyrir neðan mína virðingu að vera að væla svona og það á netinu, þá skelli ég upp brosinu og hugsa, - bara tæpar fjórar vikur eftir (eða sex ef ég fer eins að og síðast) ;o))

2004-02-28T14:51:00.000Z

Er eðlilegt að vera með nagandi samviskubit kl. 22:30 á föstudagskvöldi yfir því að vera ekki að læra?? Hvort sem svarið er já eða nei, þá var þetta a.m.k. svona hjá mér í gærkvöldi. Reyndi að horfa á sjónvarpið með Valla en eftir smátíma spurði hann mig hvað væri eiginlega að hrjá mig því ég væri búin að dæsa og andvarpa óteljandi sinnum á stuttum tíma. Spurning hvort maður sé ekki búinn að læra aðeins of mikið undanfarið. Mér finnst alltaf eins og ég sé komin á deadline með öll verkefni en fattaði svo eftir smá umhugsun í gær að ég á engu verkefni að skila fyrr en í þarnæstu viku fyrir utan eina skýrslu fyrir verklega æfingu. Þessi verklega æfing finnst mér reyndar ekki framkvæmanleg hérna heima, ofan á allt annað. Ætlaði galvösk að dengja mér í að gera hana í dag en varð að játa mig sigraða. Hún snýst um mjólkuriðnaðinn og á ég m.a. að búa til smjör og ost hérna heima í eldhúsinu mínu!!! Getur e-r sagt mér hvar ég get keypt ostahleypi svo þetta verkefni verði framkvæmanlegt? Svo á ég heldur ekki hitamæli í matargerð og hvað þá sýrustigsmæli. Finnst svolítið skítt að þurfa að fara á stúfana að leita að slíkum tólum og borga kannski offjár fyrir þá. Bara fyrir eina tilraun. Finnst nóg að hafa þurft að kaupa súrmjólk, sýrða léttmjólk, AB-mjólk og létt AB-mjólk fyrir verkefnið. Valli bað mig vinsamlegast um að splæsa á púðursykur líka svo hægt væri að borða afgangana af öllum þessum súrmjólkurlítrum ;o)

Á morgun förum við svo austur fyrir fjall í skírn. Hlakka ekkert smá til. Bæði að fá að vita nafnið á litla drengnum og að fá að snæða allar girnilegu kræsingarnar sem verða boðstólunum. Vona bara að Iðunn hagi sér almennilega, sérstaklega í kirkjunni. En ég ætla sko ekki að hreyfa mig á eftir henni eitt né neitt. Valli fær alveg að sjá um það. Það er ekki tekið út með sældinni að vera komin 33 vikur á leið. Ég er alveg hætt að geta staðið sjálf upp úr rúminu og það að ganga út í bíl tekur heldur betur á. Kúlan er búin að stækka svo óþyrmilega að fólk út um allan bæ heldur að ég sé að fara að eiga eða sé jafnvel búin að því. Í það minnsta gengin fram yfir. Þrúður nágranni pabba og mömmu spurði pabba í gær hvort hann væri orðinn afi aftur. Þegar pabbi sagði að það myndi ekki gerast fyrr en í lok apríl, gapti greyið konan. Henni fannst ég víst svo svakaleg þegar hún sá mig um daginn að henni fannst ekkert annað koma til greina en að ég væri bara búin að þessu. En maður á víst eftir að stækka meir og meir á næstu 7 vikunum. Úff!!!

2004-02-17T22:19:00.000Z

Það er nefnilega það...

Lactating Barbie? What the fuck is wrong with you?
Snap out of it and kill the kid while you still
can!

If You Were A Barbie, Which Messed Up Version Would You Be?
brought to you by Quizilla

2004-02-11T10:23:00.000Z

Allt að verða brjálað í verkefnavinnu í skólanum. Ég er svo ótrúlega sniðug (eða kannski ekki) að vera á fullu að vinna í verkefnum sem ég á að skila eftir mánuð eða svo í staðinn fyrir að einbeita mér að verkefnunum sem á að skila í næstu viku. Ótrúlegt skipulag eða þannig. Ætli þetta sé kannski sign um að ég verði bizzí við e-ð annað í miðjum mars? Don´t know. Var að koma úr mæðraskoðun og hjartsláttur sonar míns er ansi kvenlegur verð ég að segja. Ljósan spurði m.a.s. hvort þetta væri stelpa en ég sagði henni að sónarinn héldi öðru fram. Hjartslátturinn var m.a.s. hraðari en hjá Iðunni á sínum tíma. Samt passaði ég mig að drekka ekkert koffín áður en ég fór í skoðunina. Kannski þetta sé strákur með stelpuhjarta. Svona soft og ljúfur. Annað en frenjan hún systir hans.

Merkilegustu fréttirnar frá því síðast eru náttúrulega þær að hún María er búin að eiga. Þann 1. febrúar fæddist hann Frosti litli sem er by the way algjör gullmoli!! Ég er búin að kíkja tvisvar á hann. Fyrst á fæðingardeildinni og var hann þá alveg eins og mamma sín en í gær var hann alveg eins og pabbi sinn. Hvoru sem hann líkist þá er ekki leiðum að líkjast ;o) Á maður ekki alltaf að segja svona? ;o)

Valli er enn að reyna að gera það upp við sig hvar hann ætlar að læra doktorinn. Ég er svona að reyna að hafa e-r áhrif því maður þarf jú að búa þar með honum í u.þ.b. 5 ár. Um daginn stakk hann upp á California og vá hvað ég var EKKI spennt. Hef ekki nokkurn áhuga á að búa þar og það af mörgum ástæðum. Ég er mun heitari fyrir Norðurlöndunum, alveg sama hverju. Danmörk, Finnland og gott ef ekki Svíþjóð hafa komið til tals. Svo áðan hringdi Valli í mig og sagði að leiðbeinandinn hans hefði verið að koma frá Noregi og hefði ágæt bönd þar og hefði kynnst karli sem vildi endilega fá til sín e-n nema frá Íslandi. Held það hafi komið Valla á óvart hversu jákvæði ég væri fyrir því. "Sko, við erum að tala um Osló", sagði hann með tón eins og hann væri að tala um Írak eða e-ð svoleiðis. Held a.m.k. að hann sé ekki eins spenntur og ég ;o)

2004-01-20T11:59:00.000Z

Vá, hvað ég var glöð í morgun. Þegar ég opnaði fataskápinn til að ná mér í bol þá fékk ég þykkan doðrant í hausinn. Á venjulegum degi hefði ég glaðst lítt en í morgun gladdi það mig. Ástæðan var sú að innan úr bókinni flögruðu margir blaðsneplar. Peningar, halda eflaust margir en þetta var mun betra. Sónar- og bumbumyndirnar sem ég týndi í sumar eru komnar til mín again. Ég hef fellt ófá tár (aðeins að dramatísera) yfir brotthvarfi þeirra og var alveg viss um að ég myndi aldrei fá þær aftur og því fengi Iðunn aldrei að sjá myndir af sér í móðurkviði, jafnt að innan sem utan. Þið vitið, svona sentimental dæmi. Það sem mér finnst fyndnast við þetta er það að ég hef ávallt sagt: "æj, þær koma í leitirnar þegar við flytjum". Og nú erum við að fara að flytja um helgina og myndirnar finnast þá. Þó maður hafi ekki einu sinni verið að gera neitt tengt flutningunum.

Já, við erum sem sagt að fara að flytja. Ekki langt þó, því íbúðin er í næsta stigagangi. Ég er í skýjunum og hlakka ótrúlega til að fá 13 fm2 í viðbót, herbergi fyrir Iðunni og geymslu inni í íbúðinni. Svo finnst mér líka æðislegt að komast upp á aðra hæð. Já, segiði bara að ég sé rugluð. Mig dreymdi alltaf um að komast á jarðhæð og fannst ég lukkunnar pamfíll þegar það gerðist. Eftir 2 og hálft ár á jarðhæð er ég búin að fá nóg. Of margir kettir hafa heimsótt íbúðina mína, ófáir krakkar hafa rambað inn í garðinn og lagst á gluggann, gestirnir mínir halda að garðdyrnar séu aðalinngangurinn o.s.frv. Svo getur maður ekki einu sinni dottið á rassinn heima hjá sér án þess að fyrsta hugsunin sem upp poppar sé: "Shit, ætli e-r hafi séð þetta"! Það er svona þegar maður býr við innganginn og það ganga að meðaltali 50 manns framhjá garðinum dag hvern. Helmingurinn gjóar augunum inn um gluggann á leið sinni hjá, svona eins og maður sjálfur gerir stundum ósjálfrátt þegar maður gengur framhjá glugga. Sem sagt, við þetta allt losna ég uppi á 2. hæð plús það að lillinn minn fær að sofa óáreittur í vagninum sínum úti á svölum í sumar án þess að mamma hans sé að ímynda sér að rottufjölskylda sé að hreiðra um sig til fóta hjá honum.

Best að fara og lesa Atómstöðina og pakka svo smá niður fyrir flutningana.

2004-01-16T18:38:00.000Z

LOL ;o)

Reincarnation: You are nice enough to go to heaven,
but Earth won't be as fun without you. So you
shall come back as someone or something else.
As a real optimist and lighthearted person, you
always see the good in things. People probably
respect you for your wonderful personality and
love for life. People like you make the world a
happier place (please rate my quiz)

**Where will you go when you die?**(now with pics)
brought to you by Quizilla

2003-12-29T11:22:00.000Z

Maður er nú búinn að vera ansi latur að skrifa um jólin. Nóg annað að gera. Annað hvort var maður í veislum eða þá að maður var undir sæng með bók, konfekt og diet coke. Fékk fullt af æðislegum gjöfum, m.a. græjur. Þannig að núna get ég loksins farið að hlusta á geisladiskana mína á ný. Nennti tæplega að hlusta á þá í mónó (liggur við) í tölvunni. Verst að dóttirin fékk Línu langsokks-diskinn í afmælisgjöf og einokar hún því spilarann. Hún er reyndar ekki heima núna. Við hjúin fórum í bíó í gær á Love actually (ágætis afþreying) og fékk hún að kúra hjá ömmu sinni á meðan. Svo þegar við komum að sækja hana, var ekki smuga að koma henni út. Þannig að hún fékk að klára nóttina þar á bæ og kemur heim núna í hádeginu. Gjafirnar sem barnið hefur fengið núna um jólin eru alveg brjálæði. Það er svona þegar aðfangadagur og afmælið manns eru með þriggja daga fresti. Dúkkuvagn, Barbie-dót, playmó-dót, dúkka, dúkkuföt, föt, bækur, pússuspil o.fl. Íbúðin okkar litla er ekki alveg að rúma þetta allt.

Núna er ég bara farin að bíða eftir gamlárskvöldi því þá fæ ég kalkún *nammi namm*. Um að gera að hugsa um meiri mat eftir allt ofátið á manni. Það verður hræðilegt að þurfa svo að fara að borða plain mat aftur í janúar *hrollur*. Ég held að litla bumbubúanum þyki nóg um ofát mömmu sinnar. A.m.k. virðist hann vera vakandi og sparkandi allan sólarhringinn. Vakna m.a.s. upp á næturnar við spörkin í honum. Kannski hann sé eins og stóra systir - æsist upp af sykuráti. Ætla a.m.k. að fylgjast með hvort hann róist ekki á ný þegar allt konfektið, smákökurnar og nammið er búið.

2003-12-17T12:43:00.000Z

Ég man í old days þegar þessi maður hér að neðan var einn af fjölskylduvinunum. Maggi bro átti myndina á spólu og horfði á hana minnst einu sinni á dag. Ónefndur frændi okkar var líka alveg að fíla hana ;o)

You are Buck Russell (from Uncle Buck)! Your
relationships aren't the greatest (mostly by
your own accord), but if anyone has a huge
heart, it's you.

Which John Hughes Character Are You?
brought to you by Quizilla

2003-12-16T15:21:00.000Z

Í dag gerði ég svolítið sem ég geri aldrei. Ég lagði mig!! Aahhh, hvað það var gott. Svaf hátt í þrjá tíma. Allt í lagi að gera þetta með stæl, þá sjaldan maður leggur sig. Er svo búin að vera að þrífa í eldhúsinu og brjóta saman þvott. Ótrúlega hvað ég á áberandi minnst af þeim fötum sem eru þvegin á heimilinu. Ekki það að ég sé ódugleg við að þvo mín föt, heldur á ég mun minna en restin af familýjunni. Held m.a.s. að Valli eigi fleiri flíkur en einkadóttirin. Hann er nefnilega svo heppin að fá gefins föt af báðum bræðrum mínum þegar þeir fá leið á fötunum sínum (sem er ansi oft ;o) og svo fær hann líka gefins föt af litla bróður sínum sem er vaxinn upp fyrir stóra bróður.

Í kvöld ætlum við hjónaleysin að bregða okkur í bæjarferð. Dóttirin verður send til ömmu og afa á meðan, svo við getum keypt afmælis- og jólagjöfina hennar. Ætlum í leiðinni að klára allar hinar jólagjafirnar því þær eru ekki margar sem á eftir að kaupa. Verð að reyna að muna eftir að kaupa eina 1 árs afmælisgjöf fyrir litla frænda, þar sem við mæðgurnar erum að fara í barnaafmæli um helgina. Iðunn fer alveg á kostum þessa dagana og er í óðaönn að finna nafn á litla bróður sinn. Það nýjasta er Munnur og hún gefur sig ekkert með það. Hún stakk reyndar upp á Tönn í gær. Ég sagði að það væri ekki hægt að heita Tönn. Þá sagði hún, voða einlæg: "Ha ekki, en það er hægt að heita Munnur". Ekki alveg með á nótunum ;o)

2003-12-15T17:29:00.000Z

Í dag lauk ég af því leiðinlegasta sem fylgir jólunum. Það er að skrifa jólakortin. Sem betur fer voru þau "bara" þrjátíu talsins en ég var að því frá hádegi og þar til ég sótti stelpuna á leikskólann. Núna er bara að reyna að losna við óbragðið sem fylgir þessum frímerkja- og umslagasleikingum. Finnst ótrúlegt að það sé ekki hægt að fá límmiða-frímerki hér á klakanum. Keypti aldrei öðruvísi frímerki þegar ég var í U.S.A. Íslendingar sem þykjast alltaf vera svo fljótir að taka upp nýjungar *hnuss*

Hlakka til í kvöld. Úrslitin í Survivor verða þá sýnd og er ég orðin voða spennt að vanda. Systir ætlar að koma og glápa með mér. Hún er m.a.s. á leiðinni núna og ætlum við að elda e-ð saman. Reyna að aðeins að ganga á hakkbirgðirnar úr frystinum. Svona svo Valli nái að frysta jólakonfektið sem hann er búinn að vera í akkorði við að framleiða síðustu daga ;o) Íbúðin angar svoleiðis af Grand Marnier eftir herlegheitin.

2003-12-13T20:18:00.000Z

What Famous Leader Are You?

2003-12-12T10:49:00.000Z

Þá er ég búin að fá mér jólaklippinguna í ár. Lét taka alveg helling af hárinu þannig að núna er það nokkuð fyrir ofan axlir. Svo var það líka litað og settar strípur í það. Allt annað að sjá mann ;o) Valli var í stólnum við hliðina á mér og heyrði ég hann vera e-ð að spá í að láta bara snyrta hárið og kannski svo safna. Mér leist nú ekkert á það. Sagði við hann að ef hann myndi gera það þá myndi ég fá mér skálaklippingu. Hann var ekki lengi að skipta um skoðun ;o)

Hlakka til að sjá Idolið í kvöld. Ætla að fara með Iðunni til parents og glápa þar. Valli er kannski að fara út í kvöld með strákunum í Krabbó en annars kemur hann líka. Svo er náttúrulega líka aukaþátturinn af Survivor. Læt mömmu bara taka hann upp þannig að við getum horft á hann beint á eftir. Spennandi sjónvarpsdagskrá.

2003-12-11T10:24:00.000Z

Er að fara í klippingu og strípur eftir smástund. Aldeilis kominn tími á það. Valli fer líka í klippingu þá en Iðunn fór í gær. Fór aðeins í Kringluna í gær að kaupa hráefni í jólakonfekt og endaði með því að kaupa tvær jólagjafir. Báðar fyrir mága mína.

Fyrsta einkunnin kom svo í gær og var það nía. Ekki slæmt það. Svo fór ég að skoða vef aðferðafræðinámskeiðsins og sá þá að allir voru að tala um að vera búnir að fá einkunn fyrir lokaverkefnið í áfanganum. Ekki kannaðist ég við að vera búin að fá einkunn fyrir það. Stressaðist svo upp við það og fór að ímynda mér að verkefnið hefði ekki skilað sér til kennarans. Sendi henni því póst og fékk svar í morgun. Verkefnið hafði skilað sér og hún var búin að senda mér einkunn og umsögn en hún hafði bara ekki komið til mín. Ég varð ekkert smá hissa þegar ég sá einkunnina. Mín fékk barasta 9,4 fyrir það og ég sem var svo óánægð með verkefnið þegar ég sendi það frá mér. Var viss um að fá ekki hærra en 7,5 fyrir það. En ég kvarta sko ekki ;o)

2003-12-09T15:16:00.000Z

Er búin að setja inn nýjan link. Hann nefnist Ég í hundrað atriðum. Kíkið endilega á hann.

2003-12-09T10:56:00.000Z

Mikið finnst mér æðislegt að vera komin í jólafrí. Kláraði síðasta verkefnið í gær og var ekki nema rúmar 2 klst. að því. Núna er ég að drepast úr samviskubiti yfir því að vera ekki að læra og segi reglulega við sjálfa mig: "Svona, drullastu til að taka fram skólabækurnar og gera e-ð af viti". Fatta svo að ég má slappa af fram í janúar ;o) Valli er að deyja úr myndarskap. Búinn að baka tvær sortir en húsmóðirin enga. Tvö-núll fyrir húsbóndanum. Svei mér þá, ég held hann hafi barasta gaman að þessu drengurinn. Núna langar mig svo að fara í jólagjafaleiðangur en er ekki rokin út af tveimur ástæðum. Nr. 1: nenni ekki ein og nr. 2: bílinn er ekki heima. Hugsa um að fara annað kvöld í Smáralindina því þá verður farið að vera opið til kl. 22 og helst það þannig fram að jólum. Samt spurning hvort ég fái ekki Valla bara til að koma með bílinn heim á eftir því mig langar svolítið til að fara og kíkja á óléttuföt. Er hætt að passa í margt af því sem ég á.

Brynhildur og María komu í heimsókn í gærkvöldi. María kom með snakk og ídýfu með sér - höfðingi heim að bjóða. Gat nú sjálf reitt fram dæjara og gefið þeim að smakka ostastangirnar hans Valla. Sem by the way voru að heppnast í fyrsta skipti í ár. Núna eru þær alveg eins og hjá tengdó, ekki slæmt það. Þær hafa alltaf verið geðveikt grísí hjá honum en eftir að heimilisfræðikennaraneminn fór að gefa bakaranum ráð, þá hafðist það ;o) Stelpurnar fóru heim að verða eitt og ætluðu varla að þora því vegna þess að ég var búin að vera að segja þeim draugasögu. Vona að þeim hafi tekist að sofna. Mér tókst það að minnsta kosti. Vaknaði svo fyrir allar aldir til að mæta í morgunkaffi hjá lillunni.

2003-12-06T23:36:00.000Z

your bitch.

What swear word are you?
brought to you by Quizilla

2003-12-05T07:36:00.000Z

Jæja já... nú er einn og hálfur tími í aðferðafræðiprófið. Hef sjaldan þurft að lesa jafn leiðinlegt efni fyrir próf í þessum skóla. Jú, kannski ef ég tel stærðfræðina á 1. misseri með og líka námskrárfræðina á 2. misseri. En eini kosturinn við þetta leiðinlega próf er sá að þetta er síðasta lokaprófið sem ég tek í þessum skóla. Þar sem þetta er eina prófið á þessu misseri og svo er ég bara í próflausum áföngum í vor. Á nú samt ekki von á að gera e-ar gloríur á prófinu en skítt með það, bara ef ég næ 5 þá er ég sátt. *Wish me luck*

2003-12-01T15:15:00.000Z

Best að blogga til að koma mér undan að lesa þessa boring aðferðafræði. Það er alveg með ólíkindum hvað mér leiðist hún!! En svona er lífið. Maður verður víst líka að gera það sem er leiðinlegt. Ætla að taka mér hvíld frá lestrinum í kvöld til að fara á konfektgerðar námskeið með mínum heittelskaða. Gátum ekki annað en slegið til þegar það var auglýst niðrí Krabbameinsfélagi. Er nefnilega á svo góðum díl. Í morgun fórum við í sónar og þar sást lítill typpalingur í mallanum mínum. Ógeðslega spennandi!!! Hann var sko ekkert feiminn við að bera sig drengurinn. Núna hugsar maður ekki um annað en lítil blá föt, bláar snuddur o.s.frv. Best að reyna að lesa aðeins meira.

2003-11-26T22:21:00.000Z

Vá hvað ég er stundum að bilast hérna á görðunum. Það er með ólíkindum hvað fólk hérna er gjarnt á að senda börnin sín fram á gang að leika. Svo núna þegar prófin eru að koma þá ágerist það náttúrulega. Allt gert til að fá frið til að læra. Lætin í þessum krökkum geta sko gert mig crazy. Verið að rífast, hamast og jafnvel öskra bara svona upp á fun-ið. Áðan hélt ég svo að ég væri farin að heyra ofheyrnir. Heyrði í einni stelpu frammi og fullorðnum karlmanni sem var að leika við hana. Svo heyrðist alltaf e-t skrítið hljóð sem ég var ekki alveg að fatta strax í hverju var. Eftir að hafa sperrt eyrun vel og lengi grunaði mig að verið væri að draga snjóþotu eftir gólfdúkknum! Trúði því samt varla fyrst fullorðin manneskja átti í hlut. Eftir u.þ.b. 5 mínútur var ég orðin svo forvitin að ég safnaði alls kyns drasli í poka svo ég gæti gert mér upp ferð í ruslalúguna. Grunur minn reyndist réttur. Stelpan var að hjóla á hjálpardekkja hjóli og var búin að binda snjóþotuna sína aftan á og hjólaði svo fram og til baka. Ég var allt of hissa til geta sagt nokkuð af viti. Sumt fólk sko...

2003-11-10T23:09:00.001Z

Allt á fullu í skólanum. Er enn að kenna í vettvangsnáminu og finnst það hörkugaman. Var að kenna 10. bekkingum í dag og ég svo svarið það að einn drengurinn var alveg ótrúlega líkur honum Valla ;o) Var að spá hvort ég væri að ímynda mér það en Sigrún Heiða var alveg á sama máli. Ekkert smá skrítið. Skrapp í bústað um helgina með parents, systur, Valla og Iðunni. Mjög notaleg helgi. Heitur pottur, grill, spil og chill. Verst að hafa ekki geta fengið mér rauðvín með matnum.

Íbúðin angar af kryddskápafýlu :o( Helv... kattarfj... sem er búinn að yfirtaka Garðana kemur hingað inn u.þ.b. annan hvern dag. Hann drap Iðunni nærri því úr hræðslu á síðasta föstudag með að stökkva inn um gluggann um leið og hún var að leika sér þar fyrir neðan. Svo heyri ég reglulega í honum hér fyrir utan þannig að ég neyddist til að nýta mér það ráð sem ég gef öllum sem vilja ekki ókunnuga ketti inn til sín. Þ.e. að strá pipar eða e-u öðru kryddi í gluggafalsinn þannig að kötturinn vilji ekki koma inn. Verst hvað kryddlykt leggst illa í mig á þessari meðgöngu. En ég vil frekar fá klígju en kött.

2003-11-10T23:09:00.000Z

Winking Smiley

Which MSN smiley are you?
brought to you by Quizilla

2003-10-17T09:36:00.000Z

Jæja, þá er álagið í skólanum aðeins að minnka. Búin að skila fullt af verkefnum og er svo að fara skila þremur á eftir og þá er bara eitt eftir sem er vel á veg komið. Kannski kemst ég barasta með systu og Maríu í Kringluna á morgun. Næstu helgi fer ég í 25 ára afmæli og útskrift til Helenu. Hún er að klára sálfræðina stúlkan. Helgina þar á eftir fer ég til Tinnu að elda með saumaklúbbnum og svo verður ef til vill farið á ball. Allt að gerast ;o)

Á mánudaginn byrjar svo ballið hjá mér. Því þá byrjar vettvangsnámið. Er að fara að kenna saklausum börnum í Kópavogi að elda og fleira. Hlakka barasta svolítið til. Líka fínt að fá smá pásu frá fyrirlestrum í 5 vikur. Spennandi að sjá hvernig þetta kemur allt út. Farin að læra.

2003-10-17T09:34:00.000Z

You're Most Like The Season Autumn ...

You're warm, and the most approachable. You have
that gentle prescence about you. People can
relate to you, and find you easy company.
However it's likely you've been hurt in the
past and it has left you scarred so things can
become rather chilly with you at times. Being
the third Season in, you're mature, trustworthy
and loyal to your friends but prone to
depression and negative thinking.

Well done... You're the shy and sensitive season :)

?? Which Season Are You ??
brought to you by Quizilla

2003-10-13T22:33:00.000Z

My inner child is forty-five years old!

I've never really liked children, not even when I
was one. I want things neat, ordered, and
adult--fine wine instead of french fries, pina
coladas by the pool instead of beach sand
between my toes. Now if only my fellow adults
would stop acting like such, well, children!

How Old is Your Inner Child?
brought to you by Quizilla

Svo var Tinna að kvarta!! Hún er þó á betri aldri en ég ;o)

2003-10-12T12:51:00.000Z

Ég er að drukkna í verkefnum í skólanum!! Á að skila sjö verkefnum í næstu viku og svo fer ég að kenna í 5 vikur. Helgin er búin að vera nokkuð sad; heimadæmi á föstudagskvöldið, eineltisverkefni í allan gærdag og lífeðlisfræðiritgerð í gærkvöldi. Núna er ég að vesenast með hvað ég eigi að læra núna. Hvað er skást? Eitt er a.m.k. gleðilegt ;o) Próftaflan er komin og fer ég bara í eitt próf og það er þann 5. des. Ekki slæmt það! Svo er annað sem mér þykir líka gleðilegt. Það er það að núna er ég alveg farin að keyra. Síðasta fimmtudag fór ég alein á bílnum í skólann og hef ekki stoppað síðan. Ekkert smá gaman að geta keyrt hvert sem mann langar og hvenær sem er. Frelsi!! Mig langaði t.d. í nammi í gærkvöldi og Valli nennti ekki fyrir mig. Þá fattaði ég að ég gæti bara farið sjálf. Nenni nefnilega ekki að labba, því næsta sjoppa/búð er hvergi nálægt. Það er reyndar að koma búð hingað sem á að opna í þessum mánuði ;o) Loksins. Best að hella sér í lærdóm.

2003-09-20T21:30:00.000Z

Var að koma að norðan. Við Valli fórum þangað barnlaus til að fylgja ömmu hans til grafar. Fórum á fimmtudagskvöldið og vorum ekki komin á Akureyri fyrr en rétt fyrir miðnætti. Þá var líka bara farið beint að sofa en við gistum hjá hinni ömmu hans. Í gær var svo kistulagning, jarðarför og erfidrykkja. Í gærkvöldi ætluðum við svo í bíó en nenntum því engann veginn. Ákváðum bara að slappa af heima og sáum ekki eftir því. Miklu betra að fá bara ömmumat og kúra svo uppi í sófa. Tengdó, Fúsi og Gréta komu svo í heimsókn og snæddum við afganga úr erfidrykkjunni; brauðtertur, rjómapönnukökur og flatkökur með hangikjöti. Það er nú mikið betra en popp og kók í bíó. Í morgun mistókst mér hrapallega að sofa út. Var búin að vera með stórar yfirlýsingar um svefn fram að hádegi en kl. 8:34 var ég glaðvöknuð :o( Veðrið á Akureyri var ekki gott á meðan við vorum þar. Í gær var t.d. typical febrúarveður með snjó og fimbulkulda. Í dag var svo grenjandi rigning og hífandi rok. Það fuku m.a.s. tvær aspir upp með rótum í næsta nágrenni. Það sagði a.m.k. tengdaamma. Ferðin heim var svo ömurleg!! Fengum að prófa allar týpur af íslensku veðri. Glampandi sól í Varmahlíð, slydda og éljagangur (til skiptis) á Holtavörðuheiði og tólf vindstig og úrhelli í Borgarnesi. Það eina góða sem hafðist upp úr þessarri ökuferð er að ég komst pínu meira yfir bílhræðsluna. Var m.a.s. nokkuð svöl undir lok ferðarinnar. Var hætt að halda fyrir augun þó Valli væri á 120 km/klst og rúðuþurrkurnar næðu ekki sinna sínu hlutverki. Öll að koma til.

Núna er Valli að fóðra brjóstafrumurnar sínar og er það u.þ.b. 2 tíma verk. Þar af leiðandi missi ég af Tupperware-kynningu hjá Mæju Huld, sem ég var farin að hlakka til að fara á. Ætlaði meira að segja að versla e-ð þar :o/

2003-09-13T18:07:00.000Z

Which Rainbow Brite kid are you? By Growing.

2003-09-07T16:27:00.000Z

Mikið er ég roggin af sjálfri mér. Haldiði að mín hafi ekki bara keyrt í dag og í gær líka. Fæstum finnst það heyra til tíðinda þegar kona á besta aldri sest undir stýri en það er mikið stökk fyrir mig. Málið er að fyrir 9 árum tók ég bílpróf eins og flest 17 ára börn gera en aðeins 2 mánuðum síðar lagði ég aksturinn á hilluna. Ástæðan var að það byrjaði að snjóa og ég var svo hrædd við hálkuna að ég ætlaði að bíða fram á vor með að keyra. Vorið kom en ég fór aldrei að keyra aftur. Systu tókst þetta plan vel og hún fór að keyra þrátt fyrir vetrarhvíld. Nokkrum sinnum hef ég þó sest undir stýri og ákveðið að nú væri komið nóg en aldrei fór ég að keyra aftur. Tók kannski nokkra rúnta í kringum Ghettóið en ekkert alvarlegt. Aldrei datt mér í hug að fara út í alvöru umferð. En núna 9 árum síðar hef ég ákveðið að nú sé nóg komið og það verður ekkert elsku mamma núna!! Þannig að í gær fór ég niður í Örfirisey og keyrði pínulítið um þar. Svona til að fá tilfinningu fyrir að vera undir stýri. Í morgun skunduðum við litla fjölskyldan svo út og ég rúntaði um Vesturbæinn og Seltjarnarnesið. Svo tók ég á honum stóra mínum og brunaði alla leið upp í Grafarvog. Þið áttið ykkur væntanlega á því að ég þurfti að aka Hringbrautina og Miklubrautina og so on. Til að kóróna svo allt, þá ók ég aftur til baka áðan og þá var sko ágætis umferð. Að minnsta kosti var ég með hjartað í buxunum allan tímann og fannst ég negld á milli bíla alla leiðina. Ég er ekkert spá glöð með afraksturinn og nú verður farið og æft sig á hverjum degi og takmarkið er að vera orðin fær í flestan sjó eftir viku!!

2003-09-02T19:16:00.000Z

Jæja, þá er skólinn hafinn á ný. Get ekki sagt að það gleðji mig mikið. Mér finnst sumarið aldrei hafa liðið jafn hratt. Vona að veturinn komi til með að líða jafn hratt og að útskriftin komi sem fyrst. Þá er hægt að taka sér frí frá skóla þar til manni dettur e-ð meira í hug til að læra. En það yrði þá ekki fyrr en við förum til Danmerkur.

Í gær þegar ég mætti í fyrsta fyrirlesturinn tók ég eftir því að þriðja hver námsstúlka á lokaárinu virðist vera bomm. Svona er þetta víst í skóla þar sem kvenmenn eru í miklum meirihluti. Í matsalinn komu svo bumburnar alveg í hrönnum og föðmuðu og kysstu hver aðra um leið og hamingjuóskirnar ómuðu um allt. Ég man ekki eftir svona mörgum óléttum lokaársnemum í fyrra.

Best að fara og opna e-a skólabók. Merkilegt hvað maður ætlar alltaf að byrja vel, öll haust. Dugnaðurinn er reyndar alltaf að verða fljótari og fljótari að brá af manni. Spái að minni dugnaðartíð, þetta haustið, ljúki eftir klukkustund ef ekki minna...

2003-08-28T22:06:00.000Z

Jibbí!! Síðasti vinnudagurinn á morgun! Er gjörsamlega á síðustu dropunum. Í gær var of heitt, örugglega 55 gráður á Celsíus (a.m.k. í Grafarvogi,- skýjað í Gettóinu) og í dag var of blautt. Það ringdi m.a.s. niður hálsmálið á 66°norður regnstakknum. Ekki þægilegt að finna ískalda regndropa renna niður bringuna og bakið. Við erum þrjár sem erum að hætta að vinna á morgun til að fara í skóla. Vaninn er að koma með e-ð á kaffistofuna í kveðjuskyni. Svo við kæmum ekki með kræsingar allar í einu, ákvað ein að koma með sína köku í dag en við hinar komum með e-ð á morgun. Ég ætla að gerast svo lame að koma bara með snakk. Nenni sko ekki að standa hér sveitt í litla frímerkiseldhúsinu og baka e-ð. Ég er hvort eð er alltaf að kveðja á þessum leikskóla. Maður kemur bara alltaf aftur ;o) Eftir vinnu fórum við með Iðunni í klippingu. Aðalmarkmiðið var að ná þessum toppi úr augunum á henni. Ekkert smá sem hárið á barninu vex. Mér finnst hún alltaf vera í klippingu. Hún er rosalega fín, með stuttan topp og svo setti Stella klippikona tvær fastar fléttur í hana. Iðunn er ótrúlega ánægð með sig. Fór að sofa með flétturnar í sér og lofaði að skemma þær ekki nótt svo hún gæti farið með þær í leikskólann á morgun. Mamman er nefnilega ekki gerð til að eiga dætur með sítt hár. Það telst algjör mildi að ég geti almennt sett tíkó eða plain fléttu í hárið. Ætli það sé hægt að fara á e-t námskeið þar sem maður getur lært grunninn í hárgreiðslu stúlkna? Þegar við komum svo heim úr klippingunni náði stúlkukindin að sópa út einni hillunni úr ísskápnum. Úff, kaffirjómi, eplasafi, léttmjólk og rauðvín í einum stórum polli á eldhúsgólfinu :o( Valli var sko látinn þrífa það upp. Einnig var hann látinn elda til tilbreytingar og fengum við enchiladas að snæða. Voða gott! Hún Ragnhildur mín kom svo að kveðja okkur áðan. Hún og Hjörtur fljúga aftur til Danaveldis á laugardaginn :´o(

Held ég sé sick! Er búin að vera að hlusta á Islands in the stream með Dolly Parton og Kenny Rogers á rípít í hálftíma. Helvíti öflugt lag,- enda er ég með svolítið klikkaðan tónlistarsmekk hef ég heyrt. Næsta rípít-lag verður svo Rhinestone cowboy m/ Glen Campbell. Top that...

2003-08-24T19:19:00.000Z

Kaffiboðið hjá Maríu var voða nice. Vorum bara fjórar stöllurnar og kjöftuðum út í eitt við kertaljós og veitingar. María gerði ofsalega góða eplaköku og tvo heita brauðrétti. Ég mættti með teppið og hosurnar sem ég er að hekla en tók það ekkert upp úr pokanum. Mátti bara ekkert vera að því.

Í dag héngum við bara heima og þvoðum þvott. Maður var orðinn svo góður vanur að vera með þvottavélina hennar Maríu að láni. Núna safnar maður bara óhreinum þvotti og er svo heilan dag að þvo. Hundleiðinlegt :( Iðunn fékk svo að fara "ein" út á róló að leika við e-a stelpu. Við hjúin skiptumst á að standa úti í garði og fylgjast með henni. Henni fannst alveg æðislegt að fá að leika án þess að hafa pabba eða mömmu í rassgatinu. Núna eru ég og María að fara út að labba. Ætlum að vera ótrúlega duglegar í vetur og fara tvisvar í viku í svona göngutúra. Best að skella sér í sturtu áður en haldið er af stað.

2003-08-23T11:06:00.000Z

Mér leiðist. Langar til að gera e-ð skemmtilegt en veit bara ekki hvað. Er að reyna að fá barnið til að taka til allt dótið sem hún hellti úr dótakassanum sínum. Er í leiðinni að reyna að fá karlinn til að rísa úr rekkju. Veit ekki hvort er vandasamara verk :o/

Mér brá nú svolítið við jarðskjálftann í nótt enda var hann nokkuð stór. Yfir 5 á richter. Iðunn vaknaði háorgandi og var ég með hana í fanginu á rúmbríkinni. Að hugga hana. Allt í einu nötraði allt og fannst mér við myndum fleygjast á gólfið. Þá rifjaðist upp allt panikið í júní 2000. Þá var ég sko hrædd og það í heilt ár á eftir. Ég man eftir því að allan tímann sem ég bjó á 5. hæðinni í Hátúninu þá var ég hrædd við að fara að sofa á kvöldin. Sá alveg fyrir mér að það kæmi þvílíkur skjálfti um nóttina og blokkin myndi hrynja eða e-ð. Þvííkt drama ;o)

Í kvöld er ég að fara í stelpukaffi til Maríu. Það er haldið í tilefni þess að María og Andri voru að flytja í nýtt húsnæði og þetta er líka af því Ragnhildur fer að fara til DK á ný. Þannig að þetta er innflutnings- og kveðjukaffi. Hlakka til. Verð að muna eftir að taka það sem ég er að hekla, með mér. Fá Maríu kannski til að sýna mér næsta move í hosugerðinni.

2003-08-14T22:57:00.000Z

Held ég sé latasti bloggarinn hérna megin við miðbaug. Ég er alltaf í tölvunni en samt nenni ég aldrei að skrifa. Er of upptekin við að lesa annarra manna blogg ;o)

Er aftur byrjuð að vinna eftir mánaðar sumarfrí. Langaði til að fara að grenja þegar ég kom aftur. Þvílík dramatík í manni. Ég meina, maður er alveg að fara að hætta að vinna til að fara í skólann og svo er fullt af fólki sem fékk ekki mánaðar sumarfrí. Fór á laugardaginn í 25 ára afmælisboð til Ragnhildar. Hún bauð nokkrum í mat og fengum við rosalega gott lambalæri í matinn. Allir voða sáttir við matinn. Mér þótti ekkert smá gaman að sjá Helenu aftur. Hún og Jöri voru að flytja aftur heim frá Köben. Svo var ég að hitta Öbbu aftur eftir ótrúlega langan tíma. Hún leit voða vel út og er komin með mjög indælan kærasta. Veislan byrjaði afar settlega og allir sötruðu bara sitt rauða- eða hvíta vín. Og jafnvel bjór. En svo bar Ragnhildur fram hvítvínsbollu sem gerð var út hvítvíninu sem hann Valli minn bruggaði. Þetta hvítvín líkist ekki neinu hvítvíni og hvað þá að það smakkist sem slíkt. Frekar meira í átt að eplasnafs og styrkleikinn eftir því. A.m.k. urðu allir voða fullir voða fljótt. Ég fékk að sjá Hjört hennar Ragnhildar fullan í fyrsta sinn og það eru að verða þrjú ár síðan þau fóru að vera saman. Svona er það þegar fólk býr í sitthvoru landinu. Anyways, þá skemmti ég mér ótrúlega vel og það var hlegið alveg ótrúlega mikið. Svo fórum við á Gaukinn á Sixties og þar var dansað og dansað og svo farið heim. Gott kvöld það.

2003-07-30T17:46:00.000Z

Bílasala Ylfu
Dagurinn í dag hefur farið í að svara í símann og uppljóstra fávisku minni um bíla. Við Valli skelltum Volvonum á sölu því við erum að kaupa Toyotu af Grétu og Grím. Við auglýstum í Fréttablaðinu og tókum það fram að það ætti ekki að hringja fyrr en eftir kl. 17. Ég var heima í dag en Valli að vinna og það átti ekki að hringja fyrr en hann væri kominn heim. En ég get svo svarið það að síminn var rauðglóandi í allan dag og sérstaklega núna eftir kl. 17. Ég hef nú geta svarað einföldum spurningum eins hvernig bíllinn er á litinn eða hve margar dyr eru á honum. En um leið og spurningarnar fara að snúast um það sem er undir vélarhlífinni þá stend ég á gati. Þá er um að gera að setja upp rödd ljóskunnar og spyrja hvort maður eigi ekki að taka niður nafn og síma og láta kallinn svo hringja. Bíllinn er að seljast akkúrat núna og var ég að setja nafnið mitt undir sem vitundarvottur. Held ég eigi eftir að sakna hans pínulítið, svona for old times sake.

2003-07-25T11:45:00.000Z

Það er nú bara nokkuð ljúft að vera í sumarfríi. Er kannski bara að detta niður í allt of mikla leti. Í gærkvöldi skellti ég mér í náttkjólinn rétt fyrir átta og henti mér upp í rúm með bækur. Kláraði tvær bækur sem ég er búin að vera að grípa í, í nokkurn tíma. Svo ákvað ég að skella mér á e-a af nýju kiljunum mínum. Fór nefnilega í gær, með Brynhildi systur, í Mál og Menningu og skipti sjö kiljum, úr kiljuklúbbnum, sem mig langaði ekki að eiga. Ekkert smá sniðugt að geta skilað óspennandi bókum og valið sér aðrar sem er meira að manns skapi. Ein af þeim bókum sem ég fékk mér var Þetta er allt að koma eftir Hallærisgrím Helgason. Ég var reyndar búin að ákveða, hér í old days, að lesa ekkert eftir hann. Ástæðan var sú að hann sagði, í einu fjölskylduboðinu þegar hann var giftur frænku minni, að fjölskyldan mín væri aristókratar upp til hópa. Á þeim tíma sló þetta mig út af laginu og fannst mér hann bara vera að bulla. En með nokkrum þroska og ef maður reynir að vera óhlutdrægur, þá gæti þetta alveg eins verið rétt hjá honum. Anyways, þá byrjaði ég á bókinni í gær og líkaði hún bara helvíti vel. Húmorinn er mér að skapi og líka söguþráðurinn. Er að spá í að draga hana Iðunni með mér upp í rúm að lesa. Hún er nú oftast til í það. Í kvöld er það svo bíó. Vann miða f. 2 hjá mogganum á myndina The Inlaws. Systir vann líka miða og einnig María. Svo það verður hópferð í kvöld. Hlakka til. Annað kvöld er það svo brúðkaup tvö á einni viku. Hlakka líka til þess.

2003-07-22T23:33:00.000Z

Er bara svona heitt heima hjá mér?? Ég er að bilast á þessu Miðjarðarhafsloftslagi sem virðist ráða ríkjum í íbúðinni minni og það allan ársins hring. Er ekki betra að vera aðeins of kalt heldur en aðeins OF heitt?

2003-07-22T20:42:00.000Z

Þá er maður kominn aftur í bæinn eftir yndislega ferð norður. Komum í gærkvöldi og byrjuðum á að koma aðeins við hjá parents. Maggi bróðir var að koma frá Svíþjóð og lítur hann út eins og Svíi eftir þá för. Hárið lýstist ekkert smá þarna og ég held ég hafi ekki séð drenginn svona ljóshærðan síðan hann var krakki. Þegar við Valli vorum að nálgast vesturbæinn í gær, gat ég ekki annað en dæst því mér fannst ekkert gaman að vera að koma heim. Mér finnst Reykjavík miður spennandi staður til búsetu og sakna þess ofsalega að vera á Akureyri. Þó ég hafi alltaf átt heima í Reykjavík (fyrir utan árið í U.S.A) hefur mér aldrei þótt mikið til þess koma. Mig langar ekkert smá að búa þar í framtíðinni en er samt ekki alveg að sjá það gerast. Ekki nema Valli fengi stöðu sem hæfði hans menntun og sú staða er ekki til á Akureyri eins og er :o( Ég gerði margt og mikið á þessarri rúmu viku. Fór fjórum sinnum í sund, varð brún í fyrsta skipti í mörg ár (er m.a.s. brúnni en sys), brann á vinstri upphandlegg, var grýtt af 7 ára barni, fór í pikknikk í Vaglaskóg, hjálpaði til við að undirbúa brúðkaup, mætti í brúðkaup, gékk upp Gilið með kerru á undan mér (ekki auðvelt fyrir manneskju í mínum formi), horfði á RÚV með ömmu hans Valla á hverju kvöldi o.fl. o.fl. Sumt skemmtilegt og annað ekki.

2003-07-22T20:26:00.000Z

Saluton! I thinkas ke you sxouldus lerni ESPERANTO
without hesitati longe. Kontinuu kaj meetu
lotsa de newajn friendojn! Esperanto ruuuulas!

What language are you supposed to speak?
brought to you by Quizilla

Jahá það er einmitt það. Alltaf fæ ég einhverjar svona niðurstöður úr þessum prófum.

2003-07-03T23:03:00.000Z

Jæja, dagarnir líða áfram og maður reynir bara að njóta þeirra. Við hjúin eyðum dágóðum stundum úti í litla frímerkisgarðinum okkar og grillum allan andskotann. Eftir að við fengum grillið nennum við ómögulega að vera að standa yfir e-m pottum á kvöldin. Hendum bara e-u á grillið og njótum þess að borða góðan mat eftir litla fyrirhöfn. Verst að manni finnst alltaf þurfa að vera rauðvín með steikinni og gildir einu hvort það er þriðjudagur, miðvikudagur, laugardagur... Er nú ekki sagt að eitt rauðvínsglas að kveldi sé gott fyrir hjartað? Það sagði a.m.k. hjartalæknirinn hans pabba ;o)

Nú er ég alveg að fara í sumarfrí. Bara morgundagurinn og næsta vika eftir. Hlakka alveg ótrúlega mikið til. Sérstaklega vegna þess að ég ætla ekki að hanga heima allt fríið mitt, eins og oft áður. Strax eftir síðasta vinnudaginn fyrir frí, verður haldið norður yfir heiðar. Við mæðgurnar ætlum að skella okkur með Grétu mágkonu, Grími og börnum. Valli kemur ekki með því hann er að fara á smásjárnámskeið í A-Þýskalandi, verði honum að góðu. Ég ætla svoleiðis að njóta lífsins á Akureyri og vona að sólin skíni alla dagana. A.m.k. flesta þeirra. Ætla með Iðunni í sund, gönguferðir og í sveitina hans Gríms. Svo ætlar Gréta að fá einhverjar af frænkum hans Gríms til að passa Iðunni og Katríni á meðan við skreytum salinn fyrir brúðkaupsveisluna þeirra Gríms. Þau munu gifta sig þ. 19. júlí og ætlar Valli að koma með flugi norður þegar hann kemur heim frá Deutchland. Hann er búinn að lofa að kaupa einhverja fína gjöf fyrir mig úti en hversu flotta hluti eða föt er hægt að fá í Austur-Evrópu? Tja, mér er spurn :o/

Best að fara og klára að lesa fæðingarsögubókina áður en ég fer að sofa. Ciao!!

2003-06-26T21:59:00.000Z

Þegar maður svo ákveður að mæta hér til leiks fær maður barasta hálfgert sjokk. Einhverjar breytingar á blogger hafa átt sér stað og maður er bara hálfhræddur við þær. Maður var loksins búinn að átta sig á hinu og svo á maður allt í einu aftur á hættu að allt fari í skrall. Úff!!

Útskriftin hjá honum Valla mínum gekk eins og í sögu. Var reyndar frekar boring að sitja í hátt á þriðja tíma og fylgjast með hátt á átta hundrað manns taka við plagginu. Sem betur fer þekkti ég þarna einhverja fleiri en hann Valla og því gat maður setið þarna stoltur fyrir hönd margra manneskja. Veislan heima hjá tengdó var ofsalega fín. Bæði notaleg og skemmtileg. Veðrið var hið besta og eyddi maður drjúgri stund í garðinum með bjórglas í annarri og snittu í hinni. Tengdapabbi var betri en enginn (þoli ekki þegar þetta er sagt ) og skenkti ótæpilega í glösin aftur. Hættulegt þegar maður fær endalausar áfyllingar og nær ekki að fylgjast með dósa- eða flöskufjölda. Skelltum okkur svo í annað útskriftarpartý hjá Einari latínusnillingi (fékk ágætiseinkunn fyrir latínu ;o). Eftir það var svo haldið í bæinn. Byrjuðum á Ara í Ögri í góðra manna hópi. Erla og Garðar vorum þar líka. Þau komu í veisluna hans Valla og fóru svo í aðra útskriftarveislu. Mæltum okkur svo mót við þau þarna. Þórarinn sem er leiðbeinandinn hans Valla í verkefninu hans, heimtaði að fá að bjóða okkur í glas. Glasið kom og var það ekki af minni gerðinni, hálfs líters dæmi. Drykkurinn bragðaðist eins og fjórfaldur romm í gini!! Ástandið var líka eftir því. En við skemmtun okkur þó konunglega.

Hún Nulla mín var að koma á klakann áðan (þoli ekki heldur þegar þetta er sagt). Talaði áðan við hana í síma og það er alltaf eins og maður hafi bara spjallað saman síðast í gær. En við tölum aldrei saman í síma á milli landa út af msn-inu. Hlakka til að hitta hana. Bæjó spæjó...

2003-06-20T22:15:00.000Z

Þá er útskriftin hjá Valla á morgun. Ég er farin að hlakka til veislunnar en get ekki sagt það sama um athöfnina. Hann má hafa 4 gesti með sér og fara ég, tengdaforeldrar mínir og tengdaamma, sem kemur spes frá höfuðstað Norðurlandsins. Fór í gær í Kringluna með systu og var ætlunin að kaupa útskriftargjafir fyrir Valla og Maríu vinkonu, sem er líka að útskrifast á morgun. Gjöfina fyrir Valla fann ég ekki því ég kann ekki að kaupa gjafir fyrir karlmenn. Helst vildi ég kaupa bók fyrir hann en fann enga suitable. Rakst á eina um fluguhnýtingar eða eitthvað en fannst það svona frekar pungsleg gjöf. Aðrar bækur sá ég ekki nema e-ar anatómíubækur sem virkuðu frekar useless. En ég rakst á slatta af bókum eða hlutum sem ég hefði geta keypt ef hann Valli minn væri nú aðeins meiri lúði. Frekar miklu meiri lúði. Ætla samt ekki að nefna þá hluti á nafn svo ég særi engann þarna úti ;o) Sem sagt, enginn gjöf fannst í þeim leiðangri. Við systurnar fundum gjöf fyrir Maríu en ég get ekki farið nánar út í hana svona fyrirfram. Talandi um gjafir. Foreldrar mínir komu við í gær með sameiginlega útskriftargjöf f. V og afmælisgjöf f. mig (áttu eftir að gefa mér). Gjöfin var sko ekkert slor því það var gasgrill!! Við vorum ekkert smá lukkuleg þegar við borðuðum kvöldmatinn áðan ;o)

Í Kringlunni keypti ég mér eyrnalokka til að vera með á morgun. Systir keypti voða fín sólgleraugu fyrir Valla og er hann strax farinn að ganga með þau. Síðan héldum við á Makkadóní. Af einhverri óskiljanlegri ástæðu valdi ég borð við Booztbarinn. Um að gera að sitja og graðka í sig Big Mac og frönskur á meðan mjóa fólkið fær sér ávaxta- og skyrhræring og heldur áfram að vera mjótt. Rek ég þá augun í eina mjóa og sæta vera að versla þarna. Var það þá ekki hún Lukka vinkona. Var í 5 mínútna pásu frá því að farða fólkið sem leikur í Grease. Þá er boozt náttúrulega auðveldasti kosturinn. Ragnhildur, ef þú sérð þetta þá bað hún Lukka vel að heilsa. Við röbbuðum um það sama og vanalega. Þ.e. að nú yrðum við gömlu æskuvinkonurnar að fara að hittast í eitt skipti fyrir öll. Allt er rætt um það en sjaldnast er e-ð gert í því. Stefnan er sett á e-ð í júlí. Vona að það verði þegar ég er ekki bissý því aldrei slíku vant verð ég bissý crissý í júlí. Tvö brúðkaup, ein gæsun, barnaafmæli, ferðalag norður, afmæli hjá Ragnhildi (ef ég fæ e-u ráðið ;o) og svo er hann Valli kallinn að fara til Austur-Þýskalands frá 12. - 17. júlí á e-t vísinda- eða smásjáanámskeið (get aldrei sett mig nógu mikið inn í þennan heim, sorry Valli). Þann tíma verð ég einstæð móðir og ef maður er því óvanur þá tel ég að það verði svolítið bissý-tími ;o)

2003-06-16T22:36:00.000Z

Eins og sumrin eru nú yndisleg út af fyrir sig þá er alltaf eitt sem skyggir á sæluna. Það er blessaða gróðurofnæmið. Ég er búin að þjást af því síðan ég var 9-10 ára gömul og skánar það ekki með árunum. Mér finnst alveg hundleiðinlegt að þurfa alltaf að fylgjast með frjómælingum og veðurspánni. Veðurspánni?? hugsa eflaust sumir en það hefur sínar skýringar. Þar sem ofnæmistöflurnar eru ekki gefins (keypti áðan 10 töflur á tæpar 600 kr.) tími ég ekki að taka þær inn nema þegar er þurrt. Vanalega fæ ég nefnilega ekki ofnæmi þegar rignir og er blautt úti. En í dag var þessu öðruvísi farið og var ég með ofnæmi dauðans. Það var það slæmt að ég var við það að leggjast í rúmið þegar ég kom heim úr vinnunni. En nóg um þetta væl....

Tengdaforeldrar mínir hringdu alveg miður sín í mig í gærkvöldi kl. 23:10. Ástæðan var sú að þau áttuðu sig á að hafa gleymt því að afmælið mitt hefði verið þennan og allt í einu fattað það. Ég grínaðist bara með það að ég væri greinilega ekki velkomin í fjölskylduna ;o) Tengdamamma var sérstaklega miður sín vegna þess að hún hafði líka klikkað á afmælinu mínu fyrir 3 árum síðan. En það var alveg skiljanlegt þá því þetta var fyrsta afmælið mitt eftir að við Valli byrjuðum saman og hann hefði alveg geta látið þau vita. Váá, mér finnst ég vera farin að væla aftur! Er þá ekki bara best að slútta þessu?

2003-06-15T12:32:00.000Z

Afmælisbarn dagsins
...er reyndar afmælisbörn dagsins. Við systurnar erum þá orðnar 26 ára. Enn sem komið er hefur dagurinn ekki verið ideal afmælisdagur. Ég fékk ekki morgunmat í rúmið því karlinn er svo timbraður að hann sefur enn á sínu græna. Ég er svo búin að vera á þönum frá tölvunni og inn á klósett að æla rauðvíni og bjór gærkvöldsins. Ekki gaman :o( Ætla að reyna að draga karlinn fram úr og fá hann til að gera e-ð skemmtilegt með mér. Við komum ekki heim af djamminu fyrr en seint og síðar meir. Fórum reyndar heim á undan öllum hinum en fórum svo ekkert beina leið heim. Við fórum nefnilega í gegnum sexuna (stigaganginn við hliðina á okkar) og heyrðum glaum og gleði úr einni íbúðinni. Þar sem mín var orðin svolítið drukkin og kannaðist við húsráðanda frá því í gamla daga, þá bankaði mín bara upp á og við skelltum okkur í gleðskapinn. Kannaðist reyndar líka við einn gestinn sem var þar. Þetta var voða gaman allt saman. Farin að finna e-t fjör...

2003-06-14T10:31:00.000Z

Í dag mun systir útskrifast og hljóta þann (ó)skemmtilega titil kennari. Af því tilefni mun mamma halda veislu í kvöld. Iðunn er að deyja úr tilhlökkun og talar ekki um annað en að hún sé að fara í veislu til ömmu. Valli fór í gær í Kirkjuhúsið og keypti gjöf fyrir systu. Við gefum henni nefnilega Biblíuna (allt í lagi að skella því hér inn því hún veit það hvort eð er ;o). Hún bað um að fá hana því það er ótækt að vera að útskrifast sem kristinfræðikennari og eiga ekki einu sinni Biblíuna. Ég er einmitt líka með svona plan fyrir mína útskrift. Er nú þegar búin að láta marga vita að ég vilji Kitchen aid-hrærivél í útskriftargjöf. Finnst ekki hægt að vera að útskrifast sem heimilisfræðikennari og eiga einungis handþeytara. Þar sem svona hrærivél fæst ekki gefins þurfa ansi margir að slá saman í hana, held ég.

Á morgun á ég svo afmæli!! Mér finnst ótrúlegt að ég sé að verða 26 ára. Maður er nú bara farinn að banka í þrítugt. Mér finnst sorglegt að vera nær þrítugu en tvítugu í aldri. Mér finnst ég nefnilega ekki deginum eldri en 22-23 ára og flokka mig alltaf í hóp unga fólksins. En svona er þetta bara. Tengdó gáfu mér pening í afmælisgjöf og fékk ég hann á fimmtudaginn því þau verða ekki í bænum um helgina. Ég fór beint í Kringluna og keypti mér buxur og skyrtu því ég á ekkert af fötum og langaði til að vera svolítið fín í tilefni útskriftarinnar í dag. Svo er hann Valli minn nú líka að fara að útskrifast um næstu helgi. Svo rakst ég á voða flotta peysu og Valli keypti hana handa mér í afmælisgjöf. Ég er svo nýkomin úr klippingu og strípum og ætti því að geta mætt sómasamlega til fara í veisluna í kvöld. Svo er það spurning hvort það verði eitthvað kíkt á djammið. Mamma er a.m.k. búin að bjóða Iðunni að gista ef við skyldum vilja skella okkur út. Ætla bara að sjá til.

2003-06-07T01:09:00.000Z

Vá hvað það er langt síðan ég skrifaði síðast. Allt of mikið að gera hjá mér og svo er ég komin með ógeð á tölvunni. Miklu skemmtilegra að liggja uppi í sófa með bók, fara í fótabað og glápa á sjónvarp eða fara út að labba. Já talandi um að labba, þá tókum við litla fjölskyldan þátt í heilsuhlaupi Krabbameinsfélagsins í gær. Valli skráði okkur í 3 km hlaup en við hugðumst nú samt ganga. Iðunn hélt ekki vatni þegar pabbi hennar lét hana fá bolinn sem hann fékk við skráninguna. Hann sagði henni að við værum að fara að hlaupa með fólkinu í pabba vinnu. Þar sem dóttir mín er gjörn á taka hlutina alvarlega þá beit hún það í sig að við værum honestly að fara að hlaupa. Þegar við mættum niður í Krabbameinsfélag og hún sá alla hoppa og skoppa og hita upp, skellti hún sér í hópinn og hljóp á staðnum. Ekkert smá fyndin. Svo var okkur sagt að raða okkur upp fyrir aftan ráslínu, 10 km hlaupararnir fyrst og svo við hin sem ætluðum 3 km. Iðunn tróð sér áfram og vildi vera hjá 10 km hlaupurunum og reyndi ítrekað að þjófstarta. Valli varð að halda henni og var henni eigi skemmt. Að lokum var skotið af byssu og allir máttu leggja í hann. Iðunn lét ekki segja sér það tvisvar heldur tók á rás með öllum hlaupurunum. Við skötuhjúin áttum í stökustu vandræðum með að halda í við hana þar sem það voru svo margir samankomnir og við með kerru í för. Þegar við loks náðum henni vorum við nokkuð móð og alveg í hláturskasti. Við vorum ekki ein um að hlægja því fólki þótti almennt mjög fyndið að sjá 2 ára barn á harðaspretti innan um maraþonara. Í merktum bol og með númer á bringunni. En það besta var eftir. Barnanginn fékkst ekki með nokkru móti til að koma í kerruna og sagði að hún væri að hlaupa með fólkinu. Eins og gefur að skilja helltumst við heldur betur úr lestinni því þó hún hlaupi mjög hratt eftir aldri þá hafði hún ekki roð í hina. Inn á milli gekk hún og það var ekki fyrr en að 1 km liðnum að Valli náði henni í kerruna á þeim forsendum að hann skyldi segja henni sögu. Hann mátti aldrei stoppa með söguna því þá reyndi hún að standa upp og hótaði okkur því að hún ætlaði að hlaupa meira. Á tímabili fékk hún að koma upp úr og hlaupa og labba. Hún mátti ekki á annað heyra minnst en að hún fengi að hlaupa í mark. Í markið hljóp hún líka mjög hratt og blés ekki úr nös. Þegar í mark var komið fékkst hún varla til að stoppa svo ungfrú Ísland næði að skella verðlaunapening um hálsinn á henni. Þegar gullið var komið á sinn stað tók hún aftur á rás og hélt að við værum rétt að byrja. Við Valli erum enn að hlægja að þessu öllu saman. Svei mér þá ef stelpan á ekki eftir að gera það gott á hlaupabrautinni í framtíðinni. Carl Lewis hvað??

Mikið hefur gerst frá því síðast. Ég er byrjuð að vinna á leikskólanum og finnst voða gott að vera komin aftur. Er bara svolítið þreytt svona í byrjun. Allar einkunnir eru komnar og var ekkert undir átta. Valli minn stóð sig heldur betur vel með lokaverkefnið og fékk hvorki meira né minna en 9,5 í einkunn fyrir það. Geri aðrir betur!! Ég er ekkert smá stolt af honum. Best að fara og lúlla svo maður verði ferskur í fyrramálið og til í að fara og gera e-ð með hlaupadrottningunni. Góða nótt.

2003-05-27T09:38:00.000Z

Í gær fór á Gráa köttinn með Maríu. Fékk mér beyglu m/ hummus, ólífum, rauðlauk og tómötum og tvöfaldan café au lait. Virkilega gott. Ég held við höfum verið þarna í 3 klukkutíma. Það var bæði slúðrað og rætt um alvöru lífsins. Ef við hefðum einhverju ráðið þá hefðum við eflaust planað framtíðina á þessum þremur tímum. Okkar framtíð altså. Eftir það var haldið í bankann því María var að fara í bráðabirgðargreiðslumat sem kom vel út. Eftir það labbaði ég heim og dó næstum úr hita á þeirri leið. Var alveg dösuð eftir hitann og sólina þegar ég kom heim. Valli er búinn að vera lasinn síðan á sunnudagskvöld og hefur því ekki náð að vinna í lokaritgerðinni að neinu ráði á meðan. Þarf að skila henni á föstudaginn og nær alveg örugglega að gera það. Á morgun er svo fimmtugsafmæli þar sem áfengi er í boði. Ef ég þekki gestgjafana vel þá verður engin níska þegar skenkt verður í glösin. Nenni samt ekki að detta í það. Er komin með algjöran viðbjóð á að drekka, svo maður tali nú ekki um daginn eftir. Á morgun byrja ég líka að vinna. Alveg kominn tími á það. Hélt ég ætti ekki eftir að segja það en mér hundleiðist að hanga svona heima. Ég sem hef alltaf haldið því fram að það sé alltaf hægt að finna sér e-ð að gera og að ég gæti alveg hugsað mér að vera alltaf heima. Láta bara vinna fyrir mér. Þarf aðeins að endurskoða það statement.

2003-05-22T15:06:00.000Z

Jæja, þá eru komnar þrjár einkunnir af fjórum. Fékk eina 9 sem ég er mjög ánægð með. Svo fékk ég 8,5 sem ég er líka ánægð með. Var í áfanga sem ég var alla önnina að velta mér upp úr og sjá eftir að hafa valið. Svo fékk ég eina 8 sem ég er ekkert allt of ánægð með. Hefði alveg viljað fá hærra en svona er þetta bara. Þá er bara að bíða eftir síðustu einkunninni. Eins gott að maður fái hátt fyrir heimaprófið því vinnueinkunnin er alveg rífandi há. Maður verður bara að bíða og sjá.

Var að ljúka við að prófarkalesa verkefnið hans Valla og er ég voða fegin að vera búin að því. Ég lærði alveg heilan helling um brjóstakrabbamein og ræktun frumna af lestri þessum. Gæti jafnvel slegið um mig með orði og öðru ;o) Er að fara til tannsa eftir rúman klukkutíma og ætla bara að slappa af þangað til. Valli er svo að fara í keilu í kvöld með fólkinu af tilraunastofu Krabbameinsfélagsins. Hann bauð mér að koma með en ég afþakkaði það voða pent. Afsakaði það með að ég nennti ekki að redda pössun og að mig langaði til að glápa á e-a þætti í sjónvarpinu í kvöld. Var ekkert að láta það fylgja með að mig langaði ekki til að skíttapa fyrir einhverju ókunnugu fólki. Hef bara farið þrisvar í keilu. Fyrst þegar ég var í U.S.A. og var það á krakkabraut sem var með einhverju drasli í rennunni til að auðvelda leikinn. Í hin tvö skiptin fór ég með gömlu vinnunni og var áfengi við höndina í bæði skiptin. Í seinna skiptið kom Valli með líka og var hann búinn að vera með þvílíkar yfirlýsingar um það hversu sleipur hann væri í keilu. Haldiði að mín hafi ekki bara fengið fleiri stig en hann. Ætli það hafi bara verið tilviljun eða? A.m.k. hefur hann ekkert pressað á mig að koma aftur með sér.

2003-05-21T11:12:00.000Z

Er að prófarkalesa lokaritgerðina hans Valla. Eða á að minnsta kosti að vera að gera það ;o) Er búin með 4-5 blaðsíður og get ekki sagt að ég hlakki til að takast á við restina, þó það sé nú alltaf gaman að geta hjálpað til. Og ég þykist ætla að verða kennari. Ómögulegur kennari sá sem ekki hefur gaman af að nota rauða pennann. Vá hvað þetta hljómaði eitthvað pungslega - rauði penninn. Minnir mann bara á draugasögubókina Grænu höndina. Eða kannski frekar bláu höndina hans Davíðs.

Í gær talaði ég við Grétu og vorum við að ræða það hvernig við ættum að hafa júróvisíonkvöldið. Kínverskur matur, bjór og rauðvín hljómar alls ekki illa. Hlutverk okkar Valla er að koma með e-ð til að narta í yfir sjónvarpinu. Snakk og eitthvað svoleiðis. Ættum að geta reddað því. Svo ætlar Maggi mágur að vera með veðbanka um úrslitin. Sem betur fer þurfum við ekki að greiða neinu lagi atkvæði fyrr en eftir að við höfum hlustað á þau öll. Ég hef nefnilega ekkert þeirra heyrt, nema náttúrulega það íslenska og er ég ekkert alltof hrifin af því. Erla Ósk hringdi líka í gær til að athuga hvort það væri einhver stemmning fyrir að hittast á laugard.kvöldið. Því miður varð ég að afþakka það góða boð vegna fyrri plana. Yfir og út.

2003-05-20T07:43:00.000Z

Jæja þá er verið að fara í sveitaferð með leikskóla dótturinnar. Ég er alltof þreytt til að vera e-ð stemmd fyrir þessa ferð. Eins og ég er nú búin að hlakka til. Ástæðan fyrir því að ég er svona þreytt er að í gær sofnaði Iðunn svo snemma eða um kl. 19. Ég varð náttúrulega voða ánægð að fá að horfa á Survivor í friði. Ég var by the way hundóánægð með úrslitin. Jenna gerði ekki handtak í búðunum þó hún væri kannski að vinna einhverjar keppnir. Annað en Matt sem var alltaf að gera e-ð. En áfram með mitt eigið líf. Þar sem Iðunn sofnaði svona snemma þurfti hún náttúrulega að vakna snemma líka. Þá erum við að tala um kl. 4 í nótt. Hún vældi og heimtaði að fá að fara fram og fá að borða o.s.frv. Þegar klukkan var orðin hálf fimm lúffaði ég fyrir henni og gaf henni skyr. Enda sofnaði hún líka beint á eftir. Núna get ég með engu móti vakið hana, jafnvel þó ég minninst á sveitaferð. Best að fara og reyna betur. Læt ykkur vita ef e-ð drastískt gerist í ferðinni ;o)

2003-05-19T09:07:00.000Z

Þetta stemmir algjörlega ;o)

You Are Practical With Clothes: You buy things only
when you need them and are responsible. You
aren't addicted, but your wardrobe might need a
boost here and there

Are you a clothing junky? You are, aren't you?
brought to you by Quizilla

2003-05-18T19:10:00.000Z

Að sjálfsögðu keyptu pabbi og mamma eitthvað handa mér. Ég fékk: skartgripi, snyrtivörur, glasabakka og bók frá þeim. Systir keypti líka símanúmerabók handa mér. Svo keypti hún trilljón bækur handa sjálfri sér. Þetta eru allt bækur sem mig langar líka til að lesa. Fékk m.a.s. eina lánaða hjá henni. Bókin sú heitir See Jane date og er hún í anda Bridget Jones. Bara amerískari. Voða skemmtileg bók, þykir mér. Bókin sem pabbi og mamma keyptu handa mér heitir The secret dreamworld of a shopaholic. María vinkona er búin að lesa hana og mælir með henni. Hlakka til að lesa hana.

Í gærkvöldi komu systir, María og Andri í heimsókn til okkar. Við drukkum bjór, hvítvín og ferskjulíkjör og ákváðum svo að kíkja eitthvert út. María hringdi í Aðalstein og mæltum við okkur mót við hann. Aðalsteinn dró okkur á Smelly´s café því bjórinn átti að vera svo ódýr þar. Sem hann svo ekki var, því við vorum of seint á ferð. Keyptum okkur drykk og reyndum að gera gott úr þessu. Fórum m.a.s. á dansgólfið en stungum af með drykkinga og alles þegar Britney Spears fór að hljóma um allan staðinn. Réðum ekki alveg við það. Þá ætluðum við á 22 en einhverra hluta vegna skelltum við okkur á Bar 11. Þar fyrir utan hittum við Leif frænda og knúsuðum hann aðeins áður en við fórum inn. Ég dó næstum úr leiðindum þar inni. Tónlistin var hreint hræðileg og var löng röð í einhvern glymskratta því allir vildu fá að velja lag. Mig langaði ekkert til að fá að velja lag því það virtist ekkert vera í glymskrattanum sem heillaði mig. Valli ákvað bara að fara heim til að vera hress við ritgerðarsmíð í dag. Við systurnar skelltum okkur bara með honum og löbbuðum við bara heim. Systir fékk að gista á sófanum. María og Andri löbbuðu líka heim til sín og er það mun lengri leið. Við pöntuðum okkur pizzu þegar heim var komið og þurftum við að bíða í einn og hálfan tíma eftir henni. Systir og Valli voru löngu sofnuð en ég fékk það skemmtilega hlutvert að bíða eftir pizzunni. Pizzasendillinn hringdi þrisvar í mig. Tvisvar til að tilkynna hversu margar mínútur væru í hann og svo að lokum því hann fann ekki heimili mitt. Ekki sá eini sem lendir í því. Ég fann það ekki einu sinni sjálf þegar ég ætlaði að koma og skoða áður en við fluttum inn. Svo í morgun þegar á fætur var farið beið manns voða góð pizza .

2003-05-16T12:58:00.000Z

Jæja, þá er ég að fara að sækja Iðunni á leikskólann og svo skellum við okkur upp í ghettó. Systir var að hringja og var hún stödd í fríhöfninni. Hún vildi vita hvaða videóspólu ætti að kaupa fyrir litla dekurdýrið (sem er ekki ég ;o). Svo þau lendi nú ekki í að kaupa eitthvað sem hún á fyrir. Þá mundi ég eftir því þegar við systurnar vorum að koma til Íslands í jólafrí ´96 og hlökkuðum við svo til að komast heim að við gleymdum að fara í fríhöfnina. Eftir að vera búnar að lofa mömmu að kaupa handa henni sígarettur og svona. Svo þegar við komum úr útskriftarferðinni ´98 var ég engan veginn í ástandi til að versla í fríhöfninni. Með matareitrun og sprungna hljóðhimnu eftir lendinguna. Gæfuleg. En maður gat ekki svikið mömmu aftur. Best að drífa sig að hafa sig til. Hlakka til að sjá hvort þau hafi keypt e-ð fyrir mig og heyra ferðasöguna. Fyrst maður hefur sjálfur ekki efni á að fara neitt þá getur maður a.m.k. upplifað ferðalag í gegnum aðra.

2003-05-15T15:00:00.000Z

Núna ætti ég að vera búin að koma inn kommentkerfi á ný. Vona það a.m.k.

2003-05-15T14:47:00.000Z

Mamma, pabbi og systir koma heim á morgun. Hlakka til að fá þau, sérstaklega af því að þau koma með svo mikið af fötum á Iðunni ;o)

2003-05-15T14:40:00.000Z

Which Kind of Driver Are You?
by Don's Windshield Replacement

Ég keyri ekki en ef ég keyrði þá væri ég örugglega svona bílstjóri. Engan kjánagang takk ;o)

2003-05-15T14:33:00.000Z

Það er naumast maður er upptekinn við að lufsast í tölvunni. Var með kryddbrauð í ofninum og gleymdi mér aðeins...

2003-05-15T14:28:00.000Z

Var að koma heim úr Húsdýragarðinum. Þetta var voða skemmtileg ferð og þá sérstaklega fyrir börnin. Ég fór með Sigrúnu og Bergmanni syni hennar. Bergmann er nokkrum dögum eldri en Iðunn og eru þau alveg að ná saman. Þau hengdu sitthvora dudduna á hreindýrahornin hjá svínunum og beljunum. Bara svona til að æfa sig fyrir komandi aðskilnað við dudduna. Iðunn vildi nú bara fá að láta svínin fá duddurnar, svona prívat og persónulega. Svo var þarna ein kýr sem var með niðurgang. Lak svoleiðis aftan úr henni og gott ef hún var ekki með gyllinæð líka. Við flúðum þaðan út þegar hún byrjaði að prumpa alveg á fullu. Iðunn mín var svoleiðis helmingi erfiðari en Bergmann. Hann var mjög duglegur að hafa taumhald á henni og dró það verulega úr henni til að byrja með. Undir rest var hún alveg hætt að hlusta á hann og hélt sínu striki. Dóttirin mín er alveg búin að sýna mér það að stelpur þurfa ekkert að vera stilltari en strákar eða orkuminni en þeir. Við kíktum svo aðeins í IKEA og erum svo bara komnar heim í afslöppun.

2003-05-15T09:29:00.000Z

Verð að deila svolitlu með ykkur. Þetta er alveg ótrúlega fyndið ;o)

2003-05-15T07:54:00.000Z

Um leið og maður kemur einu inn þá dettur annað út. Nú eru það kommentin mín sem eru horfin. Þarf að finna eitthvað út úr því.

2003-05-15T07:47:00.000Z

Af hverju eru blöðin alltaf að segja frá því ef einhver fræg manneskja millilendir á Íslandi til að taka bensín eða eitthvað? Hvað er svona merkilegt við? Ég átta mig að minnsta kosti ekki á því.

2003-05-15T07:38:00.000Z

Yessss, það tókst. Sko mína ;o)

2003-05-15T07:22:00.000Z

Ákvað að breyta um lúkk (vona það heppnist). Ástæðan er fjöldi áskoranna því mörgum fannst svo óþægilegt að lesa hitt sökum fölleika. Svo var ég líka komin með leið á hinu útlitinu, maður er ekki í tvíburamerkinu fyrir ekki neitt ;o) Aðalástæðan er þó að núna á að vera hægt að lesa gömul blogg en ég gat ekki látið það gerast með hinu template-inu. Til hvers að vera að skrifa e-ð ef það hverfur svo jafnóðum?

2003-05-15T07:16:00.000Z

Vá hvað mig dreymdi skrítna hluti!! Skrítna tölvupósta, skrítið fólk og skrítnar peysur. Verst að hafa verið vakin upp í miðjum draum.

2003-05-15T01:38:00.000Z

What Pattern Are You?

2003-05-15T01:33:00.000Z

Er búin að vera með hausverk dauðans í allt kvöld og ætti því að fara að koma mér í háttinn. Húsdýragarðurinn tomorrow...

2003-05-12T18:18:00.000Z

Ég var að fatta ég er orðin svolítið gömul. Það fattaði ég með smá aðstoð frá stærðfræðinni. Ég var að rifja upp gamla og góða tíma og mundi þá eftir því að 12. maí 1995 var sérlega skemmtilegur og eftirminnilegur dagur í lífi mínu, Nullu og Yrsu. Svo reiknaði ég það út í huganum að það eru 8 ár síðan þessi skemmtilegi dagur var. Mér finnst eins og hann hafi verið í gær og mér finnast alls ekki hafa liðið 8 ár síðan ég var 18 ára. Jeddúdamía !!

2003-05-12T18:02:00.000Z

Angel Kiss: sweet and innocent

What Type of Kiss are You??
brought to you by Quizilla

2003-05-12T17:38:00.000Z

Mér finnst alltaf jafn undarlegt þegar fólk flokkar annað fólk niður eftir því hversu gott mál það skrifar. Mér finnst alltaf jafn undarlegt þegar fólk stimplar þá sem ekki skrifa gott mál dæmda til að skúra og skeina alla ævi. Mér finnst alltaf jafn undarlegt þegar fólk heldur að þeir sem skrifi ekki gott mál hafi ekki metnað til að gera neitt úr lífi sínu. En svona er víst lífið....

2003-05-12T15:01:00.000Z

Ég er fyrst núna að gera mér grein fyrir því að ég er komin í frí. Engar skólabækur til að lesa, engin verkefni að gera og barasta ekkert svoleiðis. Núna get ég lagst í bókalestur með góðri samvisku. Án þess að sú hugsun skjóti rótum í kollinum á manni að maður eigi nú frekar að vera að lesa fyrir skólann en til dægrastyttingar. Ætla á bókasafnið í vikunni og taka trilljón bækur, mikið hlakka ég til. Síðan er svo langt þangað til ég byrja að vinna. Fékk póst í gær um að hún vildi fá mig 26. maí eða seinna í þeirri viku. Fínt að vera heima í smá tíma svona til að hlaða batteríin en það er ekki fínt peningalega séð. En það verður bara að hafa það.

Mig langar svo til að breyta um look á síðunni minni. Finnst hún of litlaus, þ.e. bleiki liturinn er of ljós. Ég gæti náttúrulega alltaf dekkt hann en það er annað sem pirrar mig meira. Það er það að ég kunni ekki að laga síðuna þannig að hægt sé að lesa gömul blogg. Ég er að skoða önnur template og er að vonast til að finna e-t sem er algjörlega imbaproof. Það kemur bara í ljós hvað verður.

2003-05-09T15:28:00.000Z

JIBBÝ JEI
Búin að skila prófinu og get því sagt bæjó spæjó við skólann þar til í haust. Þvílík sæla og unaður. Er samt ekki búin að fatta það enn að ég sé búin. Fatta það eflaust almennilega á morgun þegar ég sé að Valli er að fara í próf og svo kemur hann heim og fer strax að læra fyrir það næsta sem er á mánudaginn. Hefur ekki einu sinni tíma til að horfa á kosningasjónvarpið með mér. Ég verð þá bara að sætta mig við að gera það ein. Ligg bara upp í rúmi með rauðvín og osta og upplifi fall ríkisstjórnarinnar ;o) Mamma, pabbi og Yrsa systir flugu til Edinborgar í nótt til að heimsækja Gísla bróður og Carly. Lúxus á liðinu. Mamma hringdi í mig fyrir hálftíma síðan og þá sátu þau inni á einhverri krá til að skýla sér frá rigningunni. Mamma varð að koma því að framfæri við mig að hún væri bara að drekka kaffi. Eins og mér dytti eitthvað annað í hug þegar hún er annars vegar ;o) Ég væri nú samt alveg til í smá bjór núna til að fagna skólalokum. Jæja, best að drífa sig að sækja lilluna á leikskólann.

2003-05-07T10:25:00.000Z

Núna er rúmlega einn og hálfur klukkutími þar til heimaprófið kemur á netið. Ég bæði kvíði og hlakka til að fá það. Ég hlakka til að geta klárað það og farið í frí frá skólanum en ég kvíði fyrir að þurfa að hella mér út í að vinna að því og er svolítið hrædd um að það verði erfitt. Sjáum nú til með það. Best að halda áfram að undirbúa sig.

2003-05-06T21:56:00.000Z

Dóttir mín er ótrúleg ;o) Hún vill fyrir alla muni ekki leyfa mér að syngja fyrir sig. Stoppar mig alltaf af og segir: "mamma, ekki syngja". Ég tók mig svo til og spurði hana af hverju ég mætti það ekki. Hverju haldið þið að dýrið hafi svarað?? Hún sagði: "Það er vont þegar mamma syngur. Vont í eyrun" !!! Haldiði að það sé bíræfni ! Ég er nú ekki svo slæmur söngvari að fólk verkji í hlustirnar. Hún um það. Það verður langt þangað til ég býð henni upp á söng á ný ;o)

2003-05-06T19:25:00.000Z

Slysaðist inn á síðu Sjálfstæðisflokksins. Þar rak ég augun í reiknivél sem er til þess gerð að reikna út þau laun sem maður fengi í vasann, bæði skv. tillögum Sjálfstæðisflokks og Samfylkingarinnar. Þessi reiknivél sannaði það enn frekar fyrir mér að málið snýst um að þeir ríku verði ríkari!!

Dæmi: Manneskja með 100.000 kr. í laun tapar 175 kr. á mánuði með því að kjósa Samfylkinguna.
Manneskja með 1.000.000 kr. í laun tapar 34.385 kr. á mánuði með því að kjósa Samfylkinguna.

2003-05-05T21:50:00.000Z

Tók annað próf fyrir fólk sem veit ekki hvað það á að kjósa.
Hér eru niðurstöðurnar mínar:

Vinstri grænir: 1035
Frjálslyndi flokkurinn: 898
Samfylkingin: 639
Nýtt afl: 608
Framsóknarflokkurinn: 476
Sjálfstæðisflokkurinn: 54

Held það sé nokkuð ljóst að ég eigi að kjósa Vinstri græna því í hinu prófinu voru þeir líka efstir hjá mér. Ég vissi náttúrulega alltaf að skoðanir mínar ættu litla samleið með skoðunum Sjálfstæðisflokksins en ég vissi ekki að samleiðin væri svona lítil.

2003-05-05T09:58:00.000Z

Var að fá símhringingu frá leikskólanum sem ég vann á síðasta sumar. Ég sótti nefnilega þar um í mars, fyrir sumarið. Hún ætlaði að setja mig á biðlista og bað mig um að hafa samband um eða eftir páska. Ég réði mig svo á leikskólann í Grafarvoginum, sem ég vann á í old days. Þannig að ég útskýrði bara fyrir henni að ég hefði ekki geta beðið svona lengi með að athuga með vinnu. Hún skildi það alveg en hélt að hún hefði sagt að ég fengi sennilegast vinnu þar. Greinilega misskilningur á ferð. Það hefði verið gott að vinna þar aftur því það er svo stutt að labba þangað og frábærar konur sem vinna þar. En þó það sé langt að fara upp í Grafarvoginn þá vann ég þar mikið lengur og þekki allt svo vel þar. Fyrir utan það þá ber ég alltaf ákveðnar taugar til þessa leikskóla og hlakka mikið til að fara að vinna þar aftur.

2003-05-04T22:48:00.000Z

Var að taka eftir því að það er ekki hægt að skoða gamlar dagbókarfærslur á síðunni minni. Þær hverfa náttúrulega þegar þær eru komnar alveg neðst en ekki er hægt að skoða þær hérna til hliðar eins og vanalegt er. Bömmer. Þarf að reyna að finna e-ð út úr því....

2003-05-04T21:44:00.000Z

Ég er...

	Love-a-Lot Bear You love to take care of others and people love being around you because you make them feel appreciated. You are very sweet and soft-spoken. You are also a romantic and consider yourself an excellent matchmaker, so you tend to be a bit nosy. But everyone still considers you the sweetest person they know.
*Take the Which Care Bear Are You?* Quiz!**

...lýsingin passar ekki við mig að öllu leyti en liturinn passar þó vel við síðuna....

2003-05-03T13:43:00.000Z

Var að koma úr Kringlunni. Fór með Iðunni og Yrsu systur. Systir var að skila lokaverkefninu sínu í gær og er hún ekkert smá fegin að vera búin með það. Innan tíðar verður hún barasta orðin kennari. Ég keypti mér ekki neitt heldur var bara að skoða og láta mig dreyma. Iðunn var alveg á útopnu og lét mann hlaupa á eftir sér út um allar trissur. Gaman að fara með svoleiðis börn í búðir eða þannig. Ekki það að ég hafi ekki gott af því að fá að hlaupa aðeins en kannski ekki alveg í Kringlunni. Best að fara að læra svolítið. Það eru nú ekki nema fjórir dagar þar til við fáum heimaprófið í hendurnar og þýðir ekkert að vera óundirbúin þegar það kemur. Ég komst inn í alla áfangana sem ég valdi fyrir næsta vetur þannig að eftir áramótin mun ég læra táknmál. Spennandi.

2003-04-30T23:54:00.000Z

Þá er síðasti skóladagur vetrarins senn að líða undir lok. Mikið er gott að þurfa ekki aftur að mæta í tíma fyrr en í haust. Ég þarf bara að rumpa heimaprófinu af þegar það kemur á vefinn og svo er það bara frí!! Ég hellti mér í það að taka vorhreingerningu þegar ég kom heim í dag. Ég var í tvo klukkutíma að brjóta saman þvott. Áttaði mig nefnilega á því að kommóðan hennar Iðunnar var full af fötum sem voru orðin allt of lítil. Það tók tímana tvo (í bókstaflegri merkingu ;o) að flokka fötin og enn lengri tíma að finna þeim góðan stað. Því allir skápar eru fullir og líka geymslan. Náði þó að troða þessu inn í einn skápinn og þar með er skápaplássið fullnýtt. Ég þreif svo ísskápinn að innan og utan, þvoði þvott og þreif ruslaskápinn. Þegar Valli kom svo heim leit hann í kringum sig og sagði: "Ætlaðir þú ekki að taka til í dag, elskan??". Ég gargaði þá bara á hann að kíkja ofan í allar skúffur og skápa og skoða þar afrakstur dagsins. Svo kíktum við á parents og borðuðum þar. Pabbi fékk sér ís í eftirmat og gaf Iðunni líka. Þá þurfti ég náttúrulega að vera eins. Sem var alveg fáránlegt af tveimur ástæðum. Í fyrsta lagi var ég alveg pakksödd og í öðru lagi þá finnst mér svona búðarís voða óspennandi. En matargatið lét það ekki aftra sér frá einni skál eða svo. Mér hefndist líka fyrir græðgina, því innan stundar var ég komin með heiftarlegan magakrampa. Engdist bara um og gat ekki ákveðið hvort verkurinn væri líkari matareitruninni í útskriftarferðinni um árið eða botnlangakastinu í janúar. Núna nokkrum klukkustundum síðar hef ég komist á þá skoðun á seinni kosturinn stemmir betur og til að kóróna dramatíkina þá er ég komin með verk í vinstra nýrað :o( Systir hvernig er hægra nýrað hjá þér?? Einhver verkur?? Það er í það minnsta vaninn. Við erum svona speglatvíburar.

2003-04-29T23:00:00.000Z

Er að hlusta á Nights in white satin í pungslegustu útgáfu ever. Sambland af píanói, fiðlu, þverflautu og gítar!! Þessi gítar á engan veginn við. Svo koma reglulega inn einhverjar bakraddir sem syngja bara aaaaaaaa og svo fá flest hljóðfærin að taka tilfinningaþrungin sóló. Nema gítarinn, hann er bara alltaf með svona undir. Þetta er svona ekta lag sem hefði geta verið á einum af diskunum sem við systurnar létum pranga inn á okkar á klaufalegan hátt hér um árið í U.S.A. Mér finnst ég m.a.s. heyra hláturinn í Ýri frænku...

2003-04-29T22:51:00.000Z

Haldiði að mín hafi ekki bara rúllað matreiðsluprófinu upp. Fékk heila níu í einkunn. Ég var ótrúlega stressuð þegar ég mætti leiks og dreymdi bara pönnukökur í nótt. Eða það er ég a.m.k. alveg viss um þó ég muni það ekki. Ég dró náttúrulega ekki pönnukökumiðann og hefði alveg getað sparað mér panikið í gær. Í staðinn þurfti ég að gera: kókossúpu með engiferkeim, tómata- og mozzarellasalat og hátíðarkrans. Allt voða gott, sérstaklega kransinn þar sem hann innihélt fyllingu með súkkulaði og döðlum, mmmm. Prófdómarinn hélt ekki vatni yfir þessum blessaða kransi og held ég að hún hafi fengið matarást á mér. Segi nú bara svona ;o) Um leið og ég kom heim dreif ég mig að reikna út lokaeinkunn úr áfanganum og reiknaðist mér til að ég ætti að fá 8.88 í heildina. Ekki slæmt að fá 9 á spjald.

Fór á bókhlöðuna með Valla áðan. Hann var að fara að ljósrita gömul próf. Ég ákvað nú að glugga í gömlum prófum úr félagsvísindadeildinni. Rakst ég þá á gamalt próf úr mannfræðinni sem var eitt af prófunum sem ég hefði átt að taka hér um árið ef ég hefði ekki ákveðið að hætta í þessum skóla. Ég renndi yfir það og sá að ég hefði alveg örugglega rúllað því upp á sínum tíma. Fórum svo til tengdó að sækja stelpuna. Tengdamamma náði í hana í leikskólann því Valli var einnig í prófi í dag og vorum við bæði lengur en til fjögur. Tengdó kom aðeins of seint að sækja hana því hún ætlaði ekki að finna leikskólann. Valli er greinilega ekki nógu góður að lóðsa til vegar. Þegar hún loksins fann leikskólann þá var þetta þriðji leikskólinn sem hún reyndi við. Við sátum svo í sumarblíðunni í garðinum hjá tengdó og gæddum okkur á afgangnum af fyrrnefndum hátíðarkransi ásamt kaffi. Gréta stakk svo upp á að við myndum hittast öll heima hjá henni og horfa á Eurovision í maí. Gætum bakað pizzur og fengið okkur smá bjór. Líst vel á það plan.

2003-04-28T17:23:00.000Z

Úff hvað ég er þreytt. Sofnaði ekki fyrr en kl. 4 í nótt eftir að hafa bylt mér til og frá í klukkustundir. Fór svo til Sigrúnar til að gera eitthvert neytendafræðsluverkefni. Get ekki sagt að ég hafi verið vel stemmd. Í fyrsta lagi djöflulli þreytt og í öðru lagi þá finnst mér eins og skólinn sé löngu búinn og fannst þetta verkefni því bara pirrandi. Vorum furðu fljótar að ljúka því af en samt slúðruðum við mest því það er svo langt síðan við höfum hittst. Á morgun er ég að fara í verklegt matreiðslupróf og finnst það hálfkjánalegt. Eitthvað svona sem maður gerði í gaggó. Svo er ég ekki alveg að kunna við það að vera að fá e-n prófdómara ofan úr bæ til að fylgjast með mér elda og svoleiðis. Við eigum að draga okkur verkefni og er ég alveg logandi hrædd um að draga pönnukökubakstur. Ég hef aðeins einu sinni á ævinni bakað pönnsur og var það í matreiðslu í 9. bekk. Því fékk ég lánaða pönnukökupönnu hjá Sigrúnu og ætla að æfa mig á eftir. Er búin að búa til deigið og er það inni í ísskáp og verður þar næstu 2 klst. eins og uppskriftin sagði til um. Mér fannst það nú heldur lint þegar ég setti það inn. Meira að segja lapþunnt. Vona að ástæðan fyrir ísskápsdvölinni sé svo það þykkni. Í það minnsta fór ég alveg eftir uppskriftinni.

2003-04-26T23:57:00.000Z

Vil svo endilega minna fólk á að það á að skrifa í gestabókina eða setja merki í gestamöppuna hér til hægri ;o)

2003-04-26T23:53:00.000Z

Ég skemmti mér mjög vel í bænum í dag. Við byrjuðum á því að heilsa upp í bröbrurnar og Iðunn og pabbi gáfu þeim brauð. Það var ein feit gæs þarna sem einokaði allt brauðið og hvæsti á hina fuglana. Iðunn skellti því bara beint framan í hana að hún væri frekjudolla. Ég veit ekki alveg af hverju dóttir mín þarf alltaf að vera með einhvern kjaft við fiðurfénaðinn á tjörninni. Um daginn sagði hún bara: "skammastu þín", aftur og aftur. Ástæðan var sú að þær vildu ekki brauðið hennar því hún henti því öllu í einhvern drullupitt og ætlaðist svo til að þær ætu það. Þegar freka gæsin var búin að éta allt brauðið ákváðum við að skella okkur á Café Paris. Iðunn heimtaði ís og köku og neitaði svo að borða það. Hún bað svo um að fá að fara á klósettið og er það í fyrsta skipti síðan hún hætti með bleyju sem hún biður sjálf um að fara á klósettið. Þegar við komum af klóinu gargaði hún yfir staðinn: "Amma, ég kúkaði". Mamma greyið fór alveg í kerfi en mér var skítsama því megnið þarna inni skildi ekki íslensku. Pabbi varð svo að fara með hana út á Austurvöll á meðan við mamma kláruðum okkar mat, því stelpan var ekki á þeim buxunum að sitja kyrr og var tvisvar sinnum næstum því búin að velta borðinu með sjóðandi heitu kaffi ofan á. Þegar við mamma komum svo út var Iðunn búin að daðra við einn ca. 4 ára strák og sníkja af honum súkkulaðikúlu af laugardagsnamminu hans. Hún kann þetta sko stelpan. Annað hvort daðrar hún við þá eða skammar. Í gær fórum við nefnilega á KFC og þar setti hún kassann í einn jafnaldra sinn og horfði ógnvekjandi í augun á honum því hann vogaði sér að kubba með kubbunum hennar. Þvílík frekja, hvaðan skildi hún hafa það... hmmm :D Í bænum sáum við svo hund sem var á stærð við folald. Þvílíkt og annað eins hef ég aldrei séð. Mér þótti nú ekki traustvekjandi að sjá stelpupísl halda í ólina hjá honum. Hún hefði ábyggilega ekkert ráðið við hann ef hann hefði rokið af stað.

Á morgun förum við í hádegismat til Grétu og co. M.a.s. maðurinn sem lítur hvorki upp úr skólabók né smásjá, hugsar að hann sjái sér fært um að taka sér smá break.

2003-04-26T17:13:00.000Z

Það er ekkert annað...

pretty fucked.

what fucked version of hello kittie are you?
brought to you by Quizilla

2003-04-26T13:56:00.000Z

Jæja þá. Ég lá uppi í rúmi í allt gærkvöld og horfði á TV. Fegurðarsamkeppnin fannst mér alveg drulluleiðinleg. E-r bannsettar tískusýningar út í eitt og hallærislegheit. Þetta er ekkert skárra en hinar fegurðarsamkeppnirnar þó þessi sé öðruvísi uppbyggð. Þannig að ég lá bara með fjarstýringuna í annarri og diet coke í hinni og skipti á milli stöðva eins og pabba er einum lagið og líkt. Þannig náði ég að horfa á hallærislega mynd um gullgröft í Alaska ásamt punktur is keppninni. Mér fannst sú sem lenti í öðru sæti langflottust. Svo fannst mér ótrúlega hallærislegt af Dóru Takefusa að segja frá því hversu mikið var rifist um það hvor ætti að vera í fyrsta og hvor í öðru. Nú getur stelpugreyið sem lenti í öðru sæti ekki annað en hugsað um það hversu nálægt því hún hafi verið að fá alla þá vinninga sem voru í boði fyrir fyrsta sætið. Sigurjón Kjartans var með mjög slappt uppistand og er ekki laust við að ég hafi roðnað fyrir hans hönd á verstu stundunum. Svo finnst mér alltaf svo hallærislegt þegar það nægir að vera íþróttamaður eða e-ð svoleiðis til að komast í dómnefnd í svona keppnum. Eru íþróttamenn með betra auga fyrir fegurð en annað fólk? Ég bara spyr.

Valli vaknaði snemma í morgun til að lesa undir próf. Prófatíðin hjá honum hefst á þriðjudaginn. Ég varð svo ofsalega glöð þegar hann yfirgaf íbúðina og fór upp í Krabbameinsfélag að læra. Mér finnst alveg hundleiðinlegt að tipla á tánum heima hjá mér þegar það er mikið nær að hann fari e-t annað að lesa. Við Valli vorum að ræða stjórnmál í gær. Ég var að ræða við hann um umræðuna sem er um það hve hallærislegt það sé hjá Samfylkingunni að reyna að höfða til kvenna. Þá kom Valli með mjög góðan punkt. Hinir flokkarnir eru að gera þetta líka, þeir reyna bara að höfða til annarra hópa. Framsókn reynir að höfða til unga fólksins með sínum loforðum og auglýsingum og kapitalistasvínin eru með ógeðslegasta slagorðið - Áfram Ísland. Reyna að höfða til Íslendingsins í okkur. Eins og maður sé e-ð meira íslenskur þó maður sleiki rassgatið á þeim og hananú.

Ætla að fara að vaska upp núna. Pabbi og mamma koma eftir smástund og þá ætlum við að rölta saman niður að Tjörn með Iðunni og hafa það nice saman.

2003-04-25T18:07:00.000Z

Ég er að leka niður úr þreytu. Mætti í skólann í hádeginu til að flytja fyrirlestur og Iðunn var með í för. Til að byrja með var hún voða stillt en færði sig svo upp á skaftið. Til allrar lukku hafði Gunnhildur kennari komið með súkkulaðirúsínur, salthnetur og vínber og Iðunn stóð náttúrulega á beit. Þegar ég var í miðjum fyrirlestri heyrist í minni: "þetta er mamma mín sem er að tala. Hún heitir Arngunnur". Þetta vakti mikla lukku hjá viðstöddum. Þegar heim var komið skelltum við mæðgur okkur út í góða veðrið. Ég varð meira en lítið glöð þegar ég sá að dóttir mín hafði mikinn áhuga á fótbolta. Nennti lítið að moka og róla heldur hljóp um víðan völl eftir einhverjum pínulitlum bolta og dró mömmu sína á eftir sér.

Ætla að glápa á sjónvarp í kvöld. Er ekki e-r fegurðarsamkeppni á Skjá einum. Við skulum sjá hvað maður endist nú yfir því. Eins og mér fannst þetta nú gaman hér í gamla daga.

2003-04-25T08:46:00.000Z

Kosningar

Vinstri grænir (xu) 54%
Frjálslyndi flokkurinn (xf) 46%
Samfylking (xs) 46%
Framsóknarflokkur (xb) 8%
Sjálfstæðisflokkur (xd) 8%

Þetta er mín útkoma út úr prófinu á þessarri síðu. Líst nokkuð vel á útkomuna en finnst samt frekar slæmt að hafa 8% hjá kapitalistunum.

2003-04-24T23:58:00.000Z

Þetta er bara búinn að vera ágætis dagur. Valli skutlaði okkur mæðgunum upp í Breiðholt um hádegi. Pabbi bauðst strax til að fara út með Iðunni þannig að hún náði að vígja skóflu- og fötusettið sem hún fékk í sumargjöf. Mamma var voða húsmóðurleg og bauð upp á hinn fínasta hátíðarmat kl. 13. Setti m.a.s. sherrý í sósuna og var ekki sátt fyrr en ég hafði gefið grænt ljós á að hún væri hin fínasta sósa. Eiginlega varð hún ekki ánægð fyrr en ég sagði að hún væri af sama klassa og sósan hans tengdapabba. Hann setur sko alltaf koníak í sína sósu og það er ekki slæmt. Eftir matinn ákváðum við að skella okkur í bíltúr suður með sjó. Við byrjuðum á að fara að Reykjanessvita. Við systur vorum alvarlega að spá í að bíða í bílnum sökum kríufóbíu. Mamma hló nú bara að okkur og sagði að það væri ca. ein kría komin til landsins og væri hæpið að hún væri akkúrat hér. Við létum tilleiðast en vorum tilbúnar til að hlaupa anytime. Parents drógu okkur svo einhverja fjósaleið (kannastu ekki við þetta viðurstyggilega orð RG ;o) og var ég alveg viss um að við myndum ekki rata til baka. Iðunn og pabbi voru í essinu sínu. Klyfu hvern steininn á fætur öðrum og ég var allan tímann að ímynda mér að pabbi fengi annað hjartaáfall þarna á staðnum. Systir hafði nú meiri áhyggjur af því að dóttir mín dytti og bryti í sér tönn og aðra. Mamma greyið alveg staurblind, spurði á tveggja mínútna fresti hvort við sæjum þau enn. Pabbi var nefnilega í mosagrænni flíspeysu sem féll einhvern veginn svo inn í náttúruna. My psychic daughter sá nokkur svín á bakaleiðinni sem við hin sáum ekki. Um daginn sá hún kýr og kanínur þegar hún labbaði í Elliðárdalnum með pabba ;o)

Í bakaleiðinni keyrðum við til Grindavíkur. Þangað hef ég ekki komið síðan ´98 og hafa nú einhver ný hús bæst við held ég. Það var ekkert smá skrítið að koma þangað aftur og rifjuðust upp margar skemmtilegar minningar. Sérstaklega þegar við stoppuðum í sjoppunni við hliðina á pöbbanum. Ég leit í kringum mig og mundi eftir öllum slagsmálunum sem áttu sér stað þar fyrir utan eftir böllin. Ekki það að slagsmál séu eitthvað skemmtileg. Fyndnast fannst mér þó sú tilhugsun að við höfðum verið tilbúnar til að flytja þangað á sínum tíma, þegar maður var að deita innanbæjarmenn. Mikið er ég glöð að það hafi ekki gerst.

2003-04-24T10:39:00.000Z

Gleðilegt sumar allir saman.
Merkilegt hvað það er alltaf allt grátt úti á sumardaginn fyrsta. Ætli sumarið verði ekki bara allt grátt og myglulegt? Það væri þó a.m.k. ekta íslenskt sumar. Nenni samt ekki að hanga bara inni í dag. Hugsa að ég skelli mér eitthvert með Iðunni. Var víst búin að lofa henni að ég skyldi kaupa ís fyrir hana, litla íssjúklinginn. Kláraði að raða í ferlimöppuna í morgun og hún er ekkert smá þykk. Hlakka til að skila henni af mér í fyrramálið. Þá er ég búin í þeim áfanga og fer bara að bíða eftir einkunn. Best að fara og hengja út úr þvottavélinni.

2003-04-23T23:30:00.000Z

Eins og mér þykja nú þessir þættir vera mikið rugl þá finnst mér þessi vera skást. Heppin ég að fá að vera hún ;o) Ég man þá tíð þegar Valli glápti alltaf á þetta rugl. Sat alveg límdur við skjáinn. En það heyrir fortíðinni til. Hvort það sé út af því að ég tuðaði svo yfir "skemmtanagildi" þáttanna eða þá að þeir hafi dalað (er það hægt)? Nema kannski það sé vegna þess að drengpjakkurinn er alltaf að læra now a days, það þori ég ekki að segja um. Ja, hann hefur a.m.k. tíma til að horfa á Boston Public, svo...

I am Phoebe!

Which Charmed One Are You?
brought to you by Quizilla

2003-04-23T23:15:00.000Z

Held ég sé að verða geðveik. Ég sit hérna við tölvuna og með reglulegu millibili heyri ég hljóð eins og einhver sé að fá sms í garðinum hjá mér. Annað hvort er ég geðveik eða þá að karlinn á hæðinni fyrir ofan er að smessast á við einhvern á meðan hann er að reykja. Nema það sé kominn enn einn draugurinn hingað til okkar ;o)

2003-04-23T12:44:00.000Z

Brjóst, brjóst

Valli fékk upphringingu áðan um að það væri komið ferskt brjóst inn á tilraunastofuna. Að sjálfsögðu lét hann það ekki fram hjá sér fara og var fljótur að rjúka á staðinn. Það er nú ekki á hverjum degi sem þvílíkt góssen er í boði...

2003-04-23T11:11:00.000Z

Skrítinn draumur

Mig dreymir ekki oft en þegar mig dreymir þá er það alltaf e-t þvílíkt rugl. Í nótt dreymdi mig að við systurnar hefðum brotist inn í íbúð hjá náunga sem við þekkjum og vorum að gramsa í ísskápnum hans þegar hann stóð okkur að verki. Í stað þess að reiðast varð hann voða glaður að sjá okkur og sagðist einmitt vera með gjafir handa okkur. Hann gaf okkur sitthvorn pakkann og í þeim voru baðsloppar. Systir fékk hvítan frottéslopp með smá blúndum í ermunum en ég fékk slopp úr e-u satínlíki og var hann með ótrúlega kerlingalegu blómamynstri. Í draumnum fannst mér ég voða fín ;o) Svo kom mamma stráksins þangað og húðskammaði okkur fyrir að vera þarna án þess að gera boð á undan okkur. Við hrökkluðumst út á sloppunum og tókum strætó heim. Er ekki einhver þarna úti sem er klár í að ráða drauma ;o)